Nagtakoban nga pagbati

  Gula 84

“Denia,” nahitutok kaniya si Mrs. Ricarte, ingon sa dili makatuo sa iyang pagbalibad.

“Kabos lang ko, Ma’am,” dugang ni Denia. “Dili ko ninyo ikapasigarbo kun mahisambog ako sa inyong pamilya.”

“Dili kami mata-pobre, Inday,” tugob sa kayano ang pagpasabot ni Mr. Ricarte “kun unsay kalipay ni James, amo kanang tumanon. Ang iyang gimahal amo usab nga mahalon.”

“Gikasubo ko, Sir,” matud ni Denia. “Pero kuwang ko sa pagtuo nga magmalipayon si James sa among kaminyoon. Walay pagmahal nga nagdungtong namong duha ug nasayod mismo niana si James.”

“Di na lang kita maghisgot kun nagminahalay kamo o wala,” matud ni Mr. Ricarte. “Ang importante mao ang imong welfare. Unsaon na man lang kun magbunga ang nahitabo ninyo! Kun magsabak ka? Pakatawhon mo ang bata nga walay ilhong amahan? Dili ka ba diay gusto nga tibuok ang pamilyang mamat-an og kahayag sa imong anak?”

“Di pa man segurado kun momabdos ba gyud ko,” ni Denia nga mihunong na sa paghilak. “Gawas pa, kun mapaangkan man ko, di ako ang labing unang babaye nga nahimong single parent. Di sab nako hikawan si James sa katungod nga ilhong amahan sa bata.”

Nagkatinan-away sila si Mr. ug Mrs. Ricarte sa iyang gisulti. Ingon sa natugkad nila ang kahugot sa iyang balibad. -- Sumpayan pa