Oras mo na, Rey Corpuz!

Gula 52

Paghigawas ni Rey Corpuz sa underground, naningkamot siyang makakuha og armas aron makaayuda siya sa mga nanulong nila ni Cong. Gustavo Bacar. Usa sa mga sakop ni Cong. Bacar ang iyang gihup-an. Dihang natungod na kini sa iyang gitagoan, gikalitan niya’g lubag ang liog niini ug gikuha ang armas niini.

Samtang didto sa gawas sa balay nagpadayon pa ang pinusilay, si Rey misaka sa ikaduhang andana sa balay aron pagpangita ni Cong. Bacar. Kinahanglang madakpan niya ang kongresista.

“Bang! Bang! Bang! Bang!

Gipusil ni Jupiter si Rey sa paghimuntog niya sa ikaduhang andana sa balay. Apan abtik nga naka-dive si Agent 11-M. Ug samtang nagpadailos siya sa salog, gipusil niya si Jupiter. Milit-ad si Jupiter ug nahagba sa salog. Patay!

Gitagsatagsa pag-abli ni Rey ang mga lawak sa ikaduhang andana sa balay. Si Vonna ang iyang gipangita.

Niining higayona, inanay nang mitang-on ang mga buto-buto didto sa gawas sa balay. Nakasulod na ang mga nanulong sa sulod sa balay. Ang uban kanila misaka sa ikaduhang andana. Nasuta ni Rey nga hiniusang puwersa diay sa Cebu City PNP, PSIB-Visayas ug 9mm ang misulong sa balay-bakasyonan ni Cong. Bacar sa dakbayan sa Sugbu.

Miabag dayon ni Rey ang kapolisan, mga sakop sa PSIB ug 9mm sa pagpangita ni Dra. Vonna Lazaro ug ingon man kang Cong. Gustavo Bacar.

Bang! Bang! Bang!

Gipabuthan nila ang nahibilin pang buhi nga mga sakop ni Cong. Bacar. Hangtod nga nakorner na gayod nila ang kongresista. Apan maglisod sila pagduol niini kay gi-hostage nila si Dra. Vonna Lazaro.

“Dili mo makadakop nako,” nagkanayon si Cong. Bacar. “Kun mamugos gyud mo, patyon ko si Doktora Lazaro.”

“Wa mi labot kun patyon mo si Doktora Lazaro, Cong. Bacar,” gikan ni Rey.“Ang importante namo mao ikaw. Kun patyon mo si Doktora Lazaro, sayon na lang unya namo ang pagdakop nimo.”

Si Cong. Bacar nahadinga-dinga. Daw naglibog na kini kun unsay angay niining buhaton. -- Taposon sunod gula