Gula 50
Nanighawak si Cong. Gustavo Bacar nga nag-atubang sa tangkal nga puthaw nga nahimutangan ni Rey Corpuz.
“Naglisod paghukom ang imong ahensiya pagsanong sa akong gikondisyon, Mr. Corpuz,” nagkanayon si Cong. Bacar, “nga buhian nila si Abaddon bugti usab sa imong kagawasan. Pero magpaabot ko sa ilang desisyon hangtod ugma.”
“Mapakyas ka, Cong. Bacar,” giingnan ni Rey ang kongresista.
Mikatawa si Cong. Bacar sa gisulti ni Rey. Ug mitalikod kini kaniya. Milakaw ang kongresista paduol sa usa ka lamesa dili layo sa tangkal nga nahimutangan ni Rey. Ibabaw sa lamesa nahimutang ang usa ka orasan.
“Hatagan ko ikaw og kalingawan, Mr. Corpuz,” nagkanayon si Cong. Bacar nga mihunong paglakaw paghitungod niini sa lamesa ug mibalik pag-atubang kang Rey.
Nakita ni Rey nga gigunitan ni Cong. Bacar ang orasan nga gipatong sa ibabaw sa lamesa. Gipaatubang sa kongresista kaniya ang maong orasan.
“Tan-awa ni,” sa kongresista pa nga ang gipasabot mao ang orasan. “Sukad karon maoy imong buhaton ang pagtukaw sa mga takna. Ugma sa udto, kun di gyud manawag nako ang 9mm aron pag-release ni Abaddon, hukman ko na ikaw sa imong kamatayon.”
Wala madugay, migawas na si Cong. Bacar kuyog sa tulo niini ka sakop sa underground.
Dihang wala na ang kongresista ug mga sakop niini, misantop lang takulahaw sa kaisipan ni Rey si Vonna. Hain man kaha ibutang nila ni Cong. Bacar si Vonna? Wala kaha sila’y gibuhat nga daotan sa doktora?
Pagkaugma sa udto...
Misulod si Cong. Bacar sa underground kuyog si Jupiter. Sa wala pa kini moduol sa iyang nahimutangan sulod sa tangkal, namatikdan ni Rey nga may giitsa kini ngadto sa ibabaw sa lamesa. Usa ka yawe!
“Oras mo na, Rey Corpuz,” nagkanayon si Cong. Bacar sa dihang nahiduol na kini kaniya. “Napupos na ang tagal sa akong pagpaabot sa hukom sa 9mm. Dili tingali ka importante alang nila kay ila ka man nga gipasagdan. Busa, hukman ko na lang ikaw sa imong kamatayon!”
Wala motingog si Rey. Wala siya masayod kun unsay iyang buhaton. -- Sumpayan pa