Oras mo na, Rey Corpuz!

Gula 48

Laing kasayoran nga gibutyag ni Cong. Gustavo Bacar kang Rey Corpuz mao nga si Prosecutor Filemon Rocantos nga maoy mibarog nga tag-iya sa Inibam Logistics didto sa Zamboanga ug sa IL Private Wharf sa lungsod sa Sibonga, Cebu igsuon diay sa iyang asawa.

“Kami nag-supply og mga armas sa grupo ni Abaddon, Mr. Corpuz,” nagkanayon si Cong. Bacar.

“Makauuwaw ang imong gibuhat, Cong. Bacar,” nagkanayon si Rey. “Magbabalaod ka man unta. Pero nganong ikaw man mismo ang nangunay pagsabotahe sa atong gobiyerno?”

“Tungod kay dili makiangayon ang gobiyerno, Mr. Corpuz,” matud ni Cong. Bacar. “Ang duol lang sa luwag sa Presidente maoy kanunay makadawat sa grasya. Nahikalimtan kaming taga Mindanao.”

Midugang pagsulti si Cong. Bacar nga ang hinungdan nganong gidakop nila si Rey Corpuz mao nga gusto nilang hayloon ang 9mm Intelligence and Detective Agency ug ang Presidential Security and Intelligence Bureau nga buhian si Abaddon bugti sa kagawasan usab ni Corpuz.

“You’re quite insane, Cong. Bacar,” ni Rey pa. “Nagtuo ka mosugot ang 9mm ug PSIB nianang maong kondisyon? Ug nagtuo kang wa kay tulobagon sa balaod sa higayon nga inyo kong i-trade kang Abaddon?”

“The distance between insanity and genius is measured only by success, Mr. Corpuz,” matud ni Cong. Bacar. “Dili ko ingon niana ka bugo. Bisan pa’g buhian nila si Abaddon, dili mahitabong ihatag ko kanimo ang imong kagawasan. Lansis lang ang tanan, Mr. Corpuz. Mouyon man o dili ang 9mm ug PSIB sa akong kondisyon, mamatay ka lang gihapon.”

 Human sa ilang panagsulti, gimandoan ni Cong. Bacar ang lalaki nga gisangpit niini sa ngalan nga Jupiter nga isulod siya sa usa ka tangkal. Dihadiha, milihok ang ginganlan og Jupiter nga giabagan sa tulo ka lalaki. Gidala nila si Rey ngadto sa underground.

Paghisulod nila sa underground, nabati ni Rey ang paghot sa usa ka iro nga doberman nga gisulod og tangkal. Sa bakanteng tangkal nga tupad sa nahimutangan sa doberman, gisulod nila ni Jupiter si Rey. Unya gikandadohan nila ang pultahan sa tangkal. -- Sumpayan pa