Gula 77
Dihang nakalakaw na si Jonas, gipadayon ni Denia ang pagpanglimpiyo sa ilang tugkaran.
Nianang pagkagabii human sa panihapon, samtang nanghugas si Denia sa mga plato didto sa kosina, miduol kaniya si Mercy.
“May bisita ka, Ate,” pahibalo sa iyang manghod.
“K-kinsa?” Nakugang si Denia.
“Si Efren, ang imong ex-bf.”
“U-unsa?”
“Nagpaabot siya nimo sa sala. Si Tatay ang nagsugo nako nga pahibaw-on ka.”
“Si Tatay na lay paatubanga niya. May gibuhat ko.”
“Ikaw ang iyang tuyo. Ako na lay tiwas nianang imong gibuhat.”
“Unsa man kahay tuyo nianang tawhana?”
“Aw unsa pa? Makigbalik nimo. Nagbuwag na man sila si Sarah. Tua na man si Sarah sa Japan, mikuyog sa penpal niyang Hapon.”
“Mao ba?”
“Pakigsultihi siya, Ate, aron magdayganay mo sa inyong gibati.”
Nakahukom si Denia nga atubangon si Efren. Si Mercy nay nagtiwas sa iyang gibuhat sa kosina.
Samtang naglakaw siya paingon sa sala, giandam niya ang iyang kaugalingon sa pagpakigtaksanay niya’g katarongan karon kang Efren. -- Sumpayan pa