Gula 47
Gidakop sa mga tawong armado si Rey Corpuz. Gikuha nila ang iyang armas ug cellphone. Unya gibinaklid sa paggapos ang iyang mga kamot.
Gidala si Rey sa mga tawong nagdakop kaniya ngadto sa balay nga pinintalan og blue nga nagbuntaog sa ibabaw sa bungtod.
Nag-inusara sa maong dapit ang balay. Layo kini sa ubang kabalayan. Sa tugkaran niini, nakita ni Rey ang armadong mga lalaki nga nagpaso-paso. Ingon sa alerto kaayo sila.
Gidala si Rey sa mga lalaking nagdakop kaniya ngadto sa sulod sa balay. Sa may sala, gipalingkod siya atubangan sa usa ka lamesa.
Wala madugay, dihay mikanaog gikan sa ikaduhang andana sa luho ug hamugaway nga balay. Nakugang si Rey pagkakita niya sa tawo nga nanaog sa hagdanan.
“Maayong pag-abot, Rey Corpuz,” nagkanayon ang maong tawo nga nakakanaog na sa hingpit sa hagdanan.
“C-Cong. Bacar?” May kahikugang ang pamunto sa sinultihan ni Rey Corpuz. “I-ikaw?”
“Ako, Mr. Corpuz!”
“U-unsay buot ipasabot niini, Congressman?”
“Nasayod kong intelihente ka, Mr. Corpuz. Sayon ra tingali kaayong sabton ang kahulogan ning sitwasyon sa atong panagkita karon.”
“Ikaw ang nagpadagit kang Vonna Lazaro?”
“Oo. Gipadagit ko siya aron mahulog ka sa among mga kamot.”
“Sa unsang katuyoan, Cong. Bacar?”
“Gusto namong bawion si Abaddon, ang lider sa international terrorists nga atua karon sa kustodiya sa PSIB.”
“U-unsa?”
Gipasabot ni Cong. Bacar si Rey sa tanan. Mitug-an ang kongresista kang Rey nga nakigkunsabo siya sa teroristang grupo nga Jehaddah Sellamiah aron lawgawon ang nagsingabot nga ASTO Summit. Dili gusto si Cong. Bacar nga mahinayon ang summit sa Sugbu.
Mitug-an usab si Cong. Bacar nga siya’y nagpapatay kang Cong. Jovito Lazaro. Giisip niyang kontrabida sa iyang kinabuhi si Cong. Lazaro kay kini ang nangulo pagsupak sa gipalabang niyang balaodnon sa Kongreso nga nagtinguha paghatag og autonomy sa Mindanao.-- Sumpayan pa