Gula 46
Gikalit paglanit ni Rey Corpuz ang armas gikan sa iyang hawak. Unya milirawliraw siya sa palibot sa balay. Nagmingaw kini.
Mainampingong misulod si Rey sa balay nga gipuy-an ni Vonna. Paghimuntog niya sa sala, nakita niyang nagpasad ang mga butang sa hawanan.
Misaka si Rey sa hagdanan. Milahos siya sa lawak ni Vonna. Walay tawo didto. Pero nagpasad usab ang mga butang sa sulod sa lawak ni Vonna.
Mibalik dayon si Rey ngadto sa silong sa balay. Igo lang siyang nahimuntog sa sala, mibagting ang iyang cellphone. Iya dayon kining gitubag.
“Kinsa ka?” Gipangutana ni Rey ang nanawag sa iyang cellphone.
“Dili na importante kun kinsa ko, Mr. Corpuz,” matud sa lalaki nga nanawag kang Rey. “Ang importante mao ang kinabuhi ni Dra. Vonna Lazaro.”
“U-unsa?” Nakignat si Rey. “Hain ninyo dad-a si Vonna?”
Gitug-anan si Rey sa nanawag sa eksaktong lokasyon sa dapit nga ilang gidad-an kang Vonna. Gihatagan siya’g sketch aron gayod makatultol siya sa dapit sa bukirang dapit sa dakbayan sa Sugbu nga maoy gidad-an sa mga tawong daotan kang Vonna.
“Kun gusto kang makitang buhi si Dra. Lazaro, Mr. Corpuz, ayaw gyud pagdalag kauban sa imong pag-ari diri. Kinahanglang ikaw ra gyung usa, Mr. Corpuz,” pahimangno sa nanawag dayong putol sa ilang panagsulti.
Wala maglangan si Rey. Mibalik siya sa nahimutangan sa iyang sakyanan. Human makapahimutang sa lingkoranan atubangan sa manibela, gipaandar dayon niya ang makina sa awto ug mipahugong sa pagpadagan. Maoy iyang tumong ang dapit nga gidad-an sa daotang mga tawo kang Vonna.
Paglabay sa 30 minutos, nahiabot na si Rey sa bukirang bahin sa dakbayan sa Sugbu. Mitipas siya’g subay sa usa ka gamay’ng karsada paingon sa Bagacay vacation house segun sa sketch nga gihatag sa tawong nanawag kaniya. Samtang nag-drive sa iyang awto, nalantaw na niya didto sa ibabaw nga bahin sa bungtod ang balay nga nagbuntaog nga pinintalan og blue. Mao kini ang iyang tumong.
Wala pay usa ka kilometro ang iyang naabot sa pagsubay sa gamay’ng karsada, nalantawan niya didto sa unahan nga may kahoy nga giali sa karsada. Napugos siya’g hunong sa nahiduol na siya niini. Mikanaog siya aron iwakli ang kahoy. Apan may mga tawong armado nga nanggawas gikan sa kasagbotan. Wala makalihok si Rey. -- Sumpayan pa