Nagtakoban nga pagbati

Gula 75

“Dili gyud tingali mi magkasinabot. Kanunay kaming mag-away. Abubhoan siya kaayo. Maldita ug dominante. Lahi ra siya nimo.”

“Kinahanglang mo-adjust ka sa iyang kinaiya, Jonas, aron motunhay ang inyong kaminyoon. Insecured lang tingali siya maong naingon siya niana.”

“Mao gyud kanay akong pagtuo. Ikaw maoy kanunay nga mahimong hinungdan sa among panaglalis tungod kay nasayod siya nga dili siya ang akong gihigugma kun dili ikaw.”

“Pwes, maglikay ka. Kun masayod siya nga nakigkita ka kanako karon, seguradong mag-alburoto na usab ang iyang buot ug tingalig lakip ako maangin sa inyong away.

Nanghupaw na usab si Jonas. “W-wa na ba diay ka mahigugma nako, Den?”

“Di na kita puyde, Jonas. Kinasal ka na ngadto kang Ester.”

Gusto na kong makigbuwag niya sa hingpit. Ikaw ang tinuod kong gihigugma ug dili siya.

“Dili kana mahimo, Jonas. Dili ko mosugot nga mahimong usa lang ka kabit. Ang panagbuwag dili maoy solusyon sa inyong suliran. Kinahanglang magsabot kamo. Ug itakli mo ang imong gugma kanako ngadto kaniya. Tun-i siya pagdawat isip imong asawa tungod kay mao kana ang kamatuoran. Gawas pa, wala nay kahigayonan nga magkatakdo pagbalik ang atong mga pagbati.

Nasihag ni Denia ang larawan sa kapait nga mihun-ag sa panagway ni Jonas. -- Sumpayan pa