Mutual understanding

Duha ang nangulitawo kanako. Kun buot hunahunaon, usa kanila ang angay kong sugton. Mamili lang ko kay pulos sila guwapo si Renante ug Gino. Pulos sab anak og adunahan. Apan wa gyod mopitik ang akong kasingkasing sa paghigugma kanila. "I'm very sorry, Gino, Renante. Naa may daghang babaye. Ayaw lang ko. Di ko gustong maglaom kamo nako." Giprangkahan ko silang duha dihang nagkadungan sila sa pagpamisita kanako. Way kadasig nga namauli ang duha. Igo na lang ko pagpanghupaw. Naluoy ako kanila. Apan di kini igong katarongan nga makigrelasyon ko sa usa sa kanilang duha. Wa koy love nga gibati bisan kinsa kanilang duha. Di ko mapugos ang akong kaugalingon.

Usa ka Domingo. Nakigpanuroy si Michael kanako. Malipayon ko kun ikauban si Michael. Ug sa akong pamatyag, mao sab kini ang feeling sa ulitawo kun ikakuyog niya ako.

Nag-window shopping kami. Nagkuptanay sa kamot. Morag ordinaryo na lang namo ang pagkupot sa kamot sa usa'g-usa. Childhood friend ko si Michael. Silingan kami sa Guadalupe. Managlahi ang unibersidad nga among gitunghaan. Parehas kami nga third year na sa college.

"Gigutom man ko, Charish. Mag-snach una ta."

Giagbayan ako ni Michael. Wa ko kuhaa ang iyang bukton nga nagsab-ay sa akong abaga. Nagpahiyom siya nako. Gipahiyoman ko sab siya.

"Sige." 

May gihangyo si Michael nako samtang nagmeryenda kami sa usa ka snack bar sa Colon.

"Sige na god, Charish. Manan-aw ta'g sine."

Sa unang higayon, mikuyog ako kang Michael sa sulod sa sinehan. Iya kong gipasandig sa iyang dughan. Unya, wala ko makasupak dihang iyang gihagkan ang akong mga ngabil. Gikusi ko siyag hinay sa iyang kilid apan gipasagdan ko siya sa iyang gibuhat.

Wala dayon ko makatulog nianang pagka gabii. Nasayod ako nga love ako ni Michael. Nabatyagan ko kini. Ug nasayod sab ko nga love sab nako siya. Morag managsama kami nga nagtuo nga nagkahinigugmaay kami pinaagi sa M.U. Apan gusto gyod nako nga madungog gikan kaniya nga love niya ako.

Nanglabay ang mga adlaw. Sa among lihok ni Michael, nagkahinigugmaay gyod kami apan wa gyod moabot ang akong gihulat nga moingon siya nga gimahal niya ako. Hangtod nga nakasal kami pagkahuman namo sa college.

Apan sa unang gabii sa among kaminyoon, labihan ang akong kalipay kay naangkon ko gyod ang dugay ko nang gipaabot.

"I love you, Charish."

"I love you, too, Mike."

Mingaw na ang sulod sa balay. Kami na lang tingali si Michael ang nagmata. Unya gipalong sa akong bana ang suga. Milubyok ang kama nga akong gihigdaan dihang mitupad sa paghigda si Michael kanako.

"Malinawon na ang akong hunahuna karon, Mike."

"Nagtuo ka ba diay nga napugos lang ko sa pagpakasal nimo kay may nahitabo na nato, Charish? Love ka nako sukad pa sa atong pag hayiskol uy!

Wa na ko motubag kay giukoban ni Michael ang akong mga ngabil sa iyang mga ngabil. Tumang kahilom ang nagpataliwala kanamo. Sa sulod sa akong dughan, dili ikahubit sa pulong ang gibati kong kalipay niadtong tungora. (Kataposan)