Oras mo na, Rey Corpuz!

Mibati'g kalibog ug kahibulong si Rey Corpuz. Nganong nahiabot man sa Inibam Logistics sa Zamboanga del Sur ang nga sourvenir program sa necrological service ni Cong. Jovito Lazaro, ang amahan ni Doktora Vonna Lazarro, nga gipatay didto sa Cebu? Nakapangutana si Rey sa iyang kaugalingon. Ug naghinuktok si Rey sa makadiyot.

Wala dangti'g dugay dihay nangabot nga mga polis ug misulod sila sa compound sa Inibam Logistics. Nakig-atubang si Rey kanila.

“Ako si Rey Corpuz,” paila niya sa iyang kaugalingon ngadto sa kapolisan. “Nag-alagad sa 9mm nga deputized sa Presidential Security and Intelligence Bureau.”

“SPO4 Crispino Orapa,” paila sab sa nangulo sa mga polis nga miresponde sa alarma ngadto kaniya. “Unsa kining hitaboa, Mr. Corpuz?”

Gidetalye pag-asoy ni Rey ang tanang mga panghitabo ngadto ni SPO4 Orapa. Gitagsatagsa niya pagsaysay ang mahinungdanong mga detalye sa iyang pag-atake sa Inibam Logistics.

Sa gihimong imbestigasyon sa kapolisan sa Zamboanga ug ni Rey Corpuz, nasayran nga usa ka piskal ang tag-iya sa Inibam Logistics, si Prosecutor Filemon Rocantos.

Walay kasayoran ang kapolisan sa Zamboanga nga nanghimo og armas ang Inibam Logistics kay narehistro man kini sa DTI isip usa ka kompaniya nga nagtanyag og freight service.

Si Prosecutor Rocantos usab ang tag-iya sa IL Private Wharf sa Sibonga, Cebu diin nadakpan ni Rey ang lider sa international terrorist group -- Jehaddah Sellamiah -- nga si Abaddon.

Nadiskobrehan usab sa Zamboanga PNP ug ni Rey nga ang Inibam Logistics maoy labing dakong pabrika og armas sa Asia nga makahimog 10,000 ka mga armas matag adlaw!

Ang problema kay si Prosecutor Filemon Rocantos wala na igkita. Gikatahong misibat dayon kini uban sa pamilya niini dihang nakabalita kini nga gisulong ni Rey Corpuz ang Inibam Logistics.

Flight means guilt, konklusyon ni Rey Corpuz. Hinuon, gisusi na sa 9mm ang pagkahanaw ni Prosecutor Rocantos ug nasuta nga wala pa kini makagawas sa Pilipinas. - Sumpayan pa