Oras mo na, Rey Corpuz!

Gula 43

Nagkasulti dayon sila si Rey Corpuz ug Agent 11-A sa cellphone. Iya kining gipahibalo sa instructions ni A-Z kaniya nga i-turnover si Abaddon ngadto sa Presidential Security and Intelligence Bureau (PSIB)- Visayas.

Human sa panagsulti nila ni Agent 11-A, si Rey miduol sa nahimutangan sa lalaki nga maoy nanimon sa kompit. Iya kining gipakigsultian. Pero wala mokompiyansa si Rey. Tingalig budhian siya niini kun makakita kini’g maayong higayon.

Buntag sayo. Maoy pagdunggo sa kompit nga gisakyan nila ni Rey sa pribadong pantalan sa Inibam Logistics nga nahimutang sa usa sa mga lungsod sa Zamboanga del Norte.

Bisan og adlawan na, miatake gayod si Rey sa Inibam Logistics. Kay wala man siya pasudla sa guwardiya nga nagbantay sa main gate, kini ang una niyang giluthang.

Ug nahitabo ang mangilngig nga pinusilay sa nakasulod na gayod si Rey sa compound sa Inibam Logistics. Usa batok daghan. Mipatigbabaw ang approach ni Rey nga provoke and confront.

Bang! Bang! Bang! Brat-tat-tat-tat! Bzing! Pow! Pow! Pow!

Misibaw sa palibot ang sipang mga buto sa nagkadaiyang kalibre sa mga armas. Hugtanay sa bakos ang pagpakigsangka ni Rey sa mga kaaway. Bisan daghan ang iyang gikasangka apan wala siya maglisod kay nakalitan man sila sa iyang pag-atake.

   Pagtang-on sa mga buto-buto, mipasad ang daghang mga patay sa compound sa Inibam Logistics. Apan wala makaseguro si Rey kun napatay ba niya ang tanang mga kaaway.

   Gisuhid ni Rey ang katibuk-an sa compound. Gisulod niya ang opisina sulod sa Inibam Logistics. Gisunod niya ang bodega diin nakaplagan niya ang daghang mga armas.

Unya, sa dapit diin didto himoa ang mga armas, may nakit-an si Rey nga usa ka papel nga nakadapit sa iyang pagtagad. Ingon sa pamilyar niya ang maong papel maong iya kining gipunit. Sa pagsuhid niya sa papel, iyang nasuta nga usa ka souvenir program sa necrological service ni anhing Cong. Jovito Lazaro ang maong papel. -- Sumpayan pa