Oras mo na, Rey Corpuz!

Gula 42

Wala mokompiyansa si Rey Corpuz. Gawas sa iyang service firearm, may gireserba siyang duha ka armas nga iyang gisuksok sa iyang hawakan. Ug sakay sa iyang awto, miadto siya sa tumoy nga bahin sa pribadong pantalan nga gibanwagan sa sodium lamp.

Mao gayo’y pagdunggo sa kompit sa iyang pag-abot. Nanaog dayon siya sa awto ug mihinay pagpaduol sa gilandigan sa kompit. May lalaki nga milatay sa damyo gikan sa kompit ug misugat kaniya.

“Ikaw rang usa?” Gipangutana siya sa lalaki. “Hain man diay ang mga sakop sa Jehaddah Sellamiah?”

“Wa na sila, Bay,” maoy tubag ni Rey.

“U-unsa?”

Ug wala mag-usik og panahon si Rey. Dihadiha gipusil niya ang lalaki nga iyang gikaatubang. Unya gisunod niya’g luthang ang mga tawo didto luwan sa kompit nga nakalitan ug wala makabantay maong wala sila makahimo pagpanalipod sa ilang kaugalingon batok kaniya.

Misaka si Rey sa kompit. Diha pay nahibiling buhi ug buot kining mopatay kaniya. Apan nakauna sa pagpabuto si Rey. Mihay-ad ang maong tawo nga naigo gyud sa patyanan sa iyang pagpusil.

Paghisulod ni Rey sa kamarote sa kompit, natukmaan niya ang usa ka tawo nga naghapa ug nagkurog sa kalisang. Pusilon unta kini ni Rey apan nausab ang iyang hukom. Iyang gimandoan sa pagpatindog ang lalaki.

“M-maluoy ka, Sir,” sa lalaki pa dihang nakatindog na kini. “Ayaw ko’g patya. W-wa koy labot ini. Makinista ra intawon ko.”

   “Dad-a ko sa dapit nga inyong gikuhaan ning mga armas nga inyong gidala dinhi sa Cebu,” giingnan ni Rey ang lalaki.

   “Layo kaayo, Sir. Sa Zamboanga man ni gikan.”

 “Nasayod ko. Dad-a ko didto sa Inibam Logistics.”

 Daw buotang karnero nga mituman ang lalaki sa mando ni Rey. Sakay sa kompit, namiya dayon sila sa IL Private Wharf. Paspas kaayo ang paglawig sa kompit tadlas sa lapad nga kadagatan.

Samtang naglawig ang kompit, gikontak ni Rey si A-Z gamit ang iyang cellphone. Gipahibalo niya kini nga nadakpan na niya si Abaddon. Mimando si A-Z nga i-turn over ang dinakpan ngadto sa custody sa PSIB-Visayas.

Human sa panagsulti nila ni A-Z, si Agent 11-A na usab maoy gitawgan ni Rey. -- Sumpayan pa