Oras mo na, Rey Corpuz!

Gula 41

Kabliton na unta ni Rey Corpuz ang gatilyo sa iyang armas dihang nailhan niya ang tawo sa iyang luyo. Si Agent 11-A.

“Dugay ka man nga nahiabot,” ni Rey nga mipaubos sa iyang armas.

“Naglisod ko’g tultol ning dapita, Double-One-M,” matud ni 11-A. “Dili pa ko suheto dinhi sa Cebu.”

“Anyway, better late than never, Double-One-A.”

“Unsa nay nahitabo dinhi?”

“Gigukod nako si Abaddon nga mora’g buot moikyas. Tabangi ko sa pagpangita niya.”

May isulti pa unta si Rey apan nakaalinggat siya nga may anino nga mikilab didto sa ngitngit nga bahin sa luyo sa bodega. Bayhon sa usa ka tawo nga midagan palayo.

“Tua ra siya,” ni Rey pa. “Alibgatan ta siya. Didto ka dapit sa may gate.”

“Areglado,” matud ni 11-A dayong biya niini sa iyang atubangan.

Milihok sab dayon si Agent 11-M. Gisundan niya si Abaddon. Wala madugay may kasikas siyang nabati. Mora’g tawong nagdagan nga nagkaduol sa iyang nahimutangan.

Dihadiha gihup-an kini ni Rey. Ug dihang nahitungod na kini kaniya, kalit kini niyang gitionan uban ang paggunit sa kamot niini.

“Abaddon?” Gikan ni Rey.

“W-who are you?” Nakapangutana si Abaddon.

“I work for the Philippine government,” mao ray gitubag ni Rey.

 Nahiabot sab dayon si Agent 11-A ug maoy miposas kang Abaddon.

 “Unsay buhaton ta kaniya, Rey?” Nangutana si Agent 11-A kaniya dihang gidala na nila si Abaddon sa atubangang bahin sa bodega.

 “May gimbuhaton pa ko nga angay tiwason, Chad,” giingnan ni Rey si Agent 11-A. “Mamalihog na lang ko nimo sa pagdala kaniya ngadto sa dakbayan sa Sugbu. Manawag lang ko kang A-Z kun unsay sunod tang buhaton sa atong dinakpan.”

“Okey,” misanong dayon si Agent 11-A.

Igo lang nakabiya si Agent 11-A sa maong dapit, nakadungog si Rey og andar sa sakyanan sa kadagatan nga nagsingabot sa pribadong pantalan. Nangandam dayon siya alang sa laing aksiyon. -- Sumpayan pa