Padulong sa mahayag nga ugma

Lab-as ug bugnaw ang hoyohoy sa hangin dala sa sayo nga kabuntagon. Mao pa gayo'y pagdunggo sa baroto sa amahan ug anak nga Maximo ug Obet gikan sa tibuok gabii nga pangisda.

"Dong Obet, ikaw na lay hipos anang atong mga gamit sa panagat modiretso ko sa ilang kumpare Doming, imbitado ko sa iyang birthday, dad-on ko ring pipila sa mga kuha nato nga barongoy aron among sugbahon," matud ni Manoy Maximo nga nagdagkot og sigarilyong Liwayway.

"Sige Tay, ako nalay bahala diri." Wala na lang mopugong si Obet kay sigurado siya nga masuko lang kini. Nakahibalo siya nga nagdali lang kini sa inom. Naanad na lang siya sa pagkapalahubog sa iyang amahan, pirme lang kini nga maglalis sa iyang Nanay Amada.

Si Nanay Amada usab niya, puwerteng pagkaungo sa sugal nga tong-its. Si Obet lang gani ang pirme nga makapanglaba o magdegamo sa kusina o mga buhat nga angay unta sa mga babaye. Walay mapili sa iyang mga ginikanan pulos kini mga buluyagon mao nga niresulta gayud sa pagkabikosbikos sa ilang pagpuyo.

Sa edad desi-otso natugkad ni Obet ang kamatuoran sa kinabuhi. Wala gayud siya'y kahigayonan nga moasenso kun magpadayon kining maong sistema sa ilang pagpuyo. Sa iyang paminaw mora og wala siya isipa nga anak nila ni Tatay Maximo ug Nanay Amada niya. Mora lang og gihimo siya nga katabang sa panagat sa iyang amahan ug katabang sa mga boluhaton sa panimalay sa iyang inahan. Tataw kaayo nga wala gayo'y panglantaw sa ugma ang iyang mga ginikanan alang kaniya.

Samtang nanghipos si Obet sa ilang mga gamit pangisda sama sa pokot, bugsay, petromax ug sa pipila usab ka kuhang mga isdang barongoy, nadani ang iyang pagtagad sa hugyaw og andar sa makina. Iyang gibaling ang iyang panan-aw didto sa dili halayo nga Holiday Beach Resort nga gipanag-iya nila ni Katrina, anak sa ilang barangay kapitan ug sa bana niini nga si Dr. Lee Labata, usa ka Japanese investor.

Didto iyang nakita ang mga maanyag nga mga babaye sakay sa speedboat ug ang uban usab niini nag-angkas sa jet ski. Seksi kaayo silang tan-awon sa ilang swimsuit. Nakasiguro si Obet nga mga gikan kini og mga adunahang pamilya kay pang high end man ang maong beach resort.

Matud sa janitor sa maong resort nga iyang nahigala, nagkalainlain lang ug lami kuno kaayo ang mga putahe sa maong resort. Nakatuaw si Obet sa iyang kaugalingon. Kanus-a pa kaha siya makatilaw sa mga putahe sa maong beach resort. Kanus-a pa kaha siya makarelasyon og mga babaye nga maanyag sa mga guest sa maong beach resort. Bisan pa siguro og moputi na ang uwak dili gayud kini mahitabo kun wala gayud siya'y maayong lakang nga pagahimuon.

Samtang sa silangan nagpadayon pagbuhagay ang banagbanag sa haring adlaw ug sa kalit lang, sulod sa kahiladman ni Obet namugna ang usa ka desisyon. Sunod semana mokuyog siya sa iyang higala nga si Mark, molalin siya gikan sa ilang barangay sa Lawis ngadto sa dakbayan sa Sugbo aron pagpanimpalad.

Puwede siya nga manarbaho sa dakbayan isip usa ka bagger o janitor ba sa mga mall o sa mga department store. Nakahunahuna usab si Obet sa pag-apply isip usa ka construction worker o security ba hinuon. Nagkadaiyang plano lang ang nasulod sa iyang hunahuna, pero daku ang iyang pagtuo nga kining iyang desisyon pagbiya sa ilang lugar maoy maghatud kaniya padulong sa dalan sa mas mahayag nga ugma. (Kataposan)