Ang butakal ni Agaw nito

Sayo pa gani sa buntag, nagguyod na si Agaw Nito sa iyang butakal. Nagsubay siya sa dalang probinsyal paingon na sa may menteryo, sa among lungsod.

"Asa ka manghabal Gaw?" gitimbaya ko siya, nga may dalang tiaw.

"Aw, bisan asa lang. Maagad lang ni, kun haing dapita ang nanguwag," tubag sa akong ig-agaw, nga dala usab ang tiaw. Naanad na man lang gud mi og komedyahay, kanang magkakita mi.

"Karon kay takdol ang buwan, siguro gyud nga daghan ang manguwag. Kay tinghubag man ron," giingnan ko si Agaw Nito.

"Mao bitaw nga nagsuroysuroy ko, basin og dunay magpahabal," ni Agaw Nito pa usab, samtang nagpunay og bira sa higot sa butakal, kay mihana man kini og lugnot.

"Maayo og molahos ka sa unahan, kay tuay nagpangita didtong biyuda," mipasumbingay ako kaniya. Apan ang tinuod, duna koy gitumong.

"Ayaw og tinonto diha Gaw. Tingali og hibatian ta," iya akong gisanta. Nakasabot tingali siya, kun si kinsay gipasabot ko.

Nasayod man gud ko, nga naibog kaayo siya kang Rosing. Ang biyuda nga naninda haduol sa may menteryo. Ug nasayud usab ko, nga wala pa gyud makadiga ang akong ig-agaw ngadto sa maong biyuda.

Naglibog hinuon ko, kun unsa gyud kahay hinungdan. Maayo man untang manabi ang akong ig-agaw. Ug sa ako ganing napanid-an dako kaayo og gusto ang biyuda kang Agaw Nito.

Magpalansis man lang gani ni og dala sa iyang binuhing baboy ngadto sa ila kang Agaw Nito, aron pahabalan. Bisan kun dili pa gani angay nga mahimong anay ang iyang baboy. Apan ang akong ig-agaw, mora’g wala lang gyud makasabot.

Usa ka higayon niana, kuyog sa usa sa akong mga higala nga si Alexis, nangadto kami sa tindahan ni Rosing aron sa pag-inom og bino. Pag-abot namo, miorder dayon kami sa among gusto.

Samtang nag-inom kami, nasigpatan ko ang butakal sa akong ig-agaw didto sa ad, kauban ang baboy ni Rosing. Bisan tuod og nakaila ko kun kinsay tag-iya sa maong butakal, nagpatusotuso lang gyud ko sa pagpangutana ngadto kang Rosing.

"Dili ba kang Nito man kanang butakal, ang kauban sa imong baboy?"

"Ang iya bitaw na. Gihangyo ko man lang gud siya nga anhi lang una na paestaha, ang iyang butakal, samtang dili pa kahabalan kanang akong baboy," maoy tubag ni Rosing kanako. Unya, mipadayon siya sa pag-ingon. "Morag dili pa man gud pahabal ang akong baboy."

"Bitaw. Molikay pa gani kini, kun han-an na og angkas sa butakal. Morag wala pa gyud kini manguwag pag-ayo," pahiuyon ko sa iyang gisulti.

"Mosemana na kanang butakala diha," dason pa sa biyuda.

"Higal ra ba unta kaayo ang butakal. Ug gusto na gyod untag kumbati," mipuno ako.

"Higal mo lang. Lahi ra gyud kaayo nang butakala kay sa tag-iya," panapos sa biyuda. (Kataposan)