Gula 39
Gipataas ni Rey Corpuz ang duha niya ka kamot. Gikuha sa armadong lalaki ang armas nga iyang gigunitan ug gihulog ngadto sa yuta.
“Kinsa ka?” Gipangutana siya sa lalaki. “Ug nganong nangahas ka pagsulod dinhi?”
Imbes motubag, igo lang mikimod si Rey. Gilansisan niya ang armadong lalaki nga may tawo sa luyo niini. Dihang milingi ang lalaki, gikalitan kini’g dasmag ni Rey ug gilubag ang kamot niini nga naggunit og armas. Nabuhian sa lalaki ang armas nga gigunitan niini.
Gisandok ni Rey sa iyang tuhod ang pugaran sa lalaki ug mitikuskos kini sa kasakit. Giusban pa gayod kini ni Rey ug nalusno kini sa yuta. Gidali ni Rey pagpunit ang iyang armas. Sa iyang paglingi, nakita niyang gikab-ot sa lalaki ang armas niini.
Tsug!
Gipusil ni Rey ang lalaki. Mikirig kini ug nabugtoan sa kinabuhi.
Milahos nag sulod si Rey sa bodega. Gipadul-an dayon niya ang mga lalaki nga nag-alirong sa usa ka lamesa. Nasuta niyang nagsugal ang maong mga tawo gamit ang baraha. Alegre kaayo sila. Gawas sa nanaglingkod, may upat ka lalaking nagbarog nga pulos nagkalibhay og armas de fuego nga pulos tag-as og kalibre.
“Maayong gabii,” nagkanayon si Rey nga migawas gikan sa iyang gipasalipdan.
Ang mga lalaki daw nakugang sa iyang presensiya. Apan sa wala pa sila makagamit sa ilang mga armas, nakapabuto na si Rey sa armas niyang may silencer. Gitagsatagsa niya’g luthang ang mga kaaway. Pulos sila mihay-ad nga wala nay mga kinabuhi.
Gikargahan ni Rey og bag-ong magasin ang iyang armas. Unya gipaliraw niya ang iyang mga mata sa palibot sulod sa bodega. Nakita niya ang usa ka hagdanan. Midali siya pagpaingon sa maong hagdanan ug misaka.
Paghimuntog niya sa taas nga bahin nga adjacent ra sa bodega, nakita ni Rey ang daghang mga lawak. Sa makadiyot naniid siya. Unya gitagsatagsa niyag abli ang pultahan sa mga lawak.
Tsug! Tsug! Tsug! Tsug!
Gipusil ni Rey ang kutob sa mga kaaway nga iyang nakit-an sulod sa mga lawak! -- Sumpayan pa