Oras mo na, Rey Corpuz!

Gula 36

Midagan si Rey ngadto sa unahan aron pagpangita’g kapasalipdan. Dihang nakakita na siya’g maayong cover, mipahimutang siya’g maayo.

Wala madugay, nakadungog siya’g mga kasikas. Unya nakita niya nga may mga aninong nagsingabot sa iyang nahimutangan nasuta niyang pulos sila nagsul-ob og turban.

Wala mag-usik og panahon si Rey. Gitagsatagsa niya pagluthang ang mga kaaway. Kaha wala magdahom ang mga kaaway nga gihup-an sila ni Rey, wala sila makahimo sa pagpanalipod sa ilang kaugalingon. Pulos sila mihay-ad nga naigo sa pagpusil ni Rey.

Human natino ni Rey nga wala nay kaaway nga nagpabiling nagbarog, mihinay siya’g gawas sa iyang gitagoan ug mipaingon sa nahagbaan sa mga kaaway nga iyang napatay. Gitagsatagsa niya’g hiling ang mga patay’ng lawas, pamasin nga may makuha siyang butang nga makatabang sa iyang imbestigasyon. Gikapkapan niya’g maayo ang mga patay’ng lawas.

Gikan sa nagkulob nga patay’ng lawas sa kaaway, nakuha ni Rey Corpuz ang usa ka cellphone dihang iya kining gihayang. Igo lang niyang nahipos ang cellphone, may mga polis nga nahiabot sa dapit nga miresponde sa nahitabong pinusilay. Gipakigsultihan sila ni Rey.

Samtang ang kapolisan naghimo pa’g dugang pakisusi sa dapit diin nahitabo ang panagsangka tali kang Rey ug sa wala mailhi niyang mga kaaway nga giila lang niya ngadto sa kapolisan nga mga sakop sa Jehaddah Sellamiah, si Rey mibalik na sa nahimutangan sa iyang sakyanan.

   Dihang nakapahimutang na siya sa sulod sa awto, gikuha niya ang cellphone nga iyang nakuha gikan sa patay’ng lawas sa usa sa mga kaaway nga iyang napatay. Maoy una niyang gihiling ang mga ngalan nga narehistro sa phonebook sa cellphone. Unya gisunod niya’g suhid ang mga text message sa inbox niini.

    Dihay usa ka text message nga nakapakignat kang Rey. Ang maong mensahe nagkanayon: “Human ninyo’g hipos ni Corpuz, sugata ninyo ang mga armas nga moabot gikan sa Zamboanga unya mga 1AM. Sila si Marco ang magdala sa maong mga butang nganha sa Cebu gikan sa Inibam Logistics. Sa IL Private Wharf idunggo ang mga butang, sa Sibonga.”

Napahit ni Rey ang ubos niyang wait sa kasayoran nga iyang nakuha gikan sa cellphone sa usa sa mga kaaway nga iyang napatay. -- Sumpayan pa