Oras mo na, Rey Corpuz!

 Gula 35

Gipaikis-ikis ni Rey Corpuz ang pagpadagan sa iyang awto aron paglikay sa nagpungasing mga bala gikan sa high-powered nga mga armas sa mga kaaway nga mipusil kaniya.

Gipakusgan pa gayod ni Rey ang pagpadagan sa iyang awto. Miliko siya sa usa ka eskina apan nasundan gihapon siya sa gisakyan sa wala mailhi niyang mga kaaway. Makadaghan si Rey magliko-liko sa lainlaing mga eskina apan nasundan gihapon siya sa mga kaaway.

Naupos ang pailob ni Rey alang sa wala mailhing mga kaaway. Nakahukom na siya pagtodas kanila. Maong giyatakan niya’g kusog ang gasolinador. Misutoy pagdagan ang awto ngadto sa unahan.

Dihang nalayo-layo na siya sa sakyanan sa mga kaaway nga migukod kaniya, gikalit niya’g lubag ang manibela sa iyang awto. Mihimo siya’g pinapilit kaayong liko balik sa agi. Unya giyatakan niya ang brake niini. Kalit kaayong mihunong ang awto.

Nalantawan ni Rey nga nagsingabot na ang gisakyan sa mga kaaway sa iyang nahimutangan. Dihadiha gi-activate ni Rey ang remote operated grenadelauncher (ROGL) sa atubangang bahin sa iyang awto. Unya gipindot niya ang release button. Dihadiha na-release ang remote operated grenade ug mirumbo ngadto sa gisakyan sa mga kaaway.

Nasugamak ang gisakyan sa mga kaaway. Maayong pagkaigo niini sa remote operated grenade. Miulbo ang sakyanan sa mga kaaway.

Gipadagan dayon ni Rey ang iyang awto ug gipadul-an ang nahimutangan sa nabungkag nga sakyanan sa mga kaaway. Nagpasad ang mga debris niini sa dalan. Mikanaog si Rey sa iyang gisakyan ug unya misuhid sa palibot. Nakita niya nga nagbuy-od sa sementadong karsada ang patay’ng lawas sa mga kaaway. Pulos sila nag-turban.

Unya, kalit lang may sakyanan nga migawas gikan sa usa ka eskina ug nagkaduol kini sa iyang nahimutangan. Naalerto gilayon si Rey. Dihang gipusil siya sa mga nagsakay sa maong sakyanan, abtik siyang miikis-ikis pagdagan.

Misulod si Rey sa usa ka eskinita. Namatikdan niyang nanganaog gikan sa sakyanan ang mga kaaway ug mipaingon sa eskinitang iyang gipaingnan. Nangandam si Rey. Mao na kini ang iyang higayon. -- Sumpayan pa