Nangandam dayon si Rey Corpuz. Nakasabot siya nga siya gyud ang gisundan sa mga nagsakay sa Nissan X-trail nga nagkaduol na sa iyang gisakyan nga awto.
Wala ma-rattle si Rey. Matag karon ug unya mosil-ip siya sa side mirror ug sa rear view mirror sa iyang sakyanan aron panid-an ang sakyanan nga nagsunod kaniya.
Gipakusgan ni Rey ang pagpadagan sa iyang awto. Namatikdan niyang mikusog sab ang pagdagan sa Nissan X-trail nga nagsunod kaniya. Pag-abot niya sa usa ka eskina, miliko siya. Miliko usab ang Nissan X-trail. Miliko na usab siya sa laing eskina apan gisundan gihapon siya sa maong sakyanan.
Dinhi nasuta ni Rey nga siya gayod ang tuyo sa mga tawong nagsakay sa maong sakyanan. May button nga gituslok si Rey ilawom sa manibela sa awto. Dihadiha, awtomatik nga naabli ang baggage compartment sa luyong bahin sa awto ug nangahulog ngadto sa karsada ang daghan kaayong mga suyak.
Ang Nissan X-trail nga nagsunod sa gisakyan ni Rey Corpuz nasugamak sa suyak. Nakatunob ang upat ka ligid niini sa mga suyak. Mihiyos ang mga ligid niini ug wala na makagukod sa gisakyan ni Rey Corpuz. Nakapahiyom si Rey sa gidangatan sa gisakyan sa mga tawong may daotan unta tingaling tuyo kaniya.
Nakaginhawa’g luag si Rey. Relaks ug komportable na kaayo siyang nagmaneho sa iyang awto. Apan pagsaylo niya sa usa ka eskina, nakamatikod siyang may lain na usab nga sakyanan nga misunod kaniya. Usa ka Nissan Urvan ang maong sakyanan.
Gipakusgan ni Rey ang pagpadagan sa iyang awto ug miliko siya sa usa ka eskina. Apan mikusog usab ang pagdagan sa maong sakyanan ug miliko usab kini sa eskina nga iyang gilikoan. Nasuta ni Rey nga siya gihapoy tuyo sa mga nagsakay sa maong sakyanan. Dihadiha gilanit niya ang armas gikan sa iyang hawakan.
Brat-tat-tat-tat-tat-tat!
Girapido si Rey sa mga tawong nagsakay sa sakyanan nga kusog kaayong migukod kaniya. -- Sumpayan pa