Wa damha ni Bingbong nga kalit lang miduaw sa iyang panimalay si Joel, usa sa mga tri-head servant sa charismatic nga kapunongan nga iyang gisakopan. Nasayod na siya ngano nga mikalit lang pagtunga si Joel sa iyang panimalay ning buntaga. Milanat na og kapin sa bulan ang pagpalta niya sa tanang kalihokan sa Servant Community.
"Bro Bingbong, nangunay gyud ko sa pagduaw kanimo, aron kumostahon ka! Gimingaw na kaming tanan nimo, sa wa mo na pagpatim-aw sa atong Community...!"
Nagpanglingo si Bingbong nga abtik kaayong midalit og pan-sikwate sa iyang bisita.
"Unsaon, linga na kaayo ko’s pinobre kong panginabuhian, Bro Joel! Gikinahanglan nga mokayod aron makasapar ang akong kinitaan sa materyal ug pinansyal kong panginahanglan matag adlaw! Hagbay pa kong naghulat sa milagro ug grasya nga hilom kong gipangayo sa atong Ginoo. Apan wa man dungga ang akong pag-ampo, bugti unta sa akong pagkasakop sa atong Servant Community! Wa gyu’y milagro nga miabot sa akong kinabuhi, sama sa mga milagro nga atomatik nga gihatag sa atong Ginoo sa tanang nagmasakiton sa karaang panahon...!"
Gipikpik ni Joel ang abaga ni Bingbong.
"Daan pa lagi ko ngano nga wa na ka motambong sa atong mga tulumanon sa Servant Community, Bro Bingbong...!"
"May kahiubos ko’s atong Ginoo, Bro Joel! Hagbay pa kong nag-ampo sa atong Ginoo, apan hangtod karon, nag-ilaid gihapon ang akong kaugalingon sa tumang kalisod, bisan pa man kun ulitawong gulang ko. Monas ginhawa ang pagluto ko’g mga siyakoy ug isuroy sa mga suki ko sa among barangay! Apan wa gyud nako masinati ang grasyang milagro sa atong Ginoo...!" pahungaw ni Bingbong sa iyang kaugalingon.
"Bro Bingbong, ang mga milagro nga ihatag kanato sa atong Ginoo, moabot ra gayud sa atong kinabuhi. Tinuod, adunay atomatik nga milagro nga ipasinati sa atong Ginoo ngadto sa uban tang kaigsoonan. Apan sila, mao kadtong kinasingkasing nga miila, misalig ug mituo sa atong Ginoo nga Diyos, Hari ug Manluluwas! Aber, pangutan-a kuno ang imong kaugalingon, kun sa imong pagkasakop sa atong Community, naghupot ba ikaw sa maong lig-ong pagtuo ngadto sa atong Ginoo!"
Nahimut-okan si Bingbong sa pangutana ni Joel. Kay sa tinuod lang, sa gidugayon na niyang pagkasakop sa charismatic nga kapunongan, luag pa gihapon ang iyang pagsalig, pag-ila ug pagtuo sa Ginoo.
"Balik sa pagtambong sa tanang kalihokan sa atong Community, Bro Bingbong, Ayaw pagpakawala og paglaom! Pahugti ang imong pagtuo sa atong Ginoo, aron masinati nimo ang mga milagro nga imong gipangayo ngadto Kaniya! Nasayod ang atong Ginoo nga dako pa ang imong kakulangan sa pagpangalagad ngadto kaniya....!"
Dugay na nga nakalakaw si Joel niadtong buntaga, apan nagpabilin gihapon si Bingbong sa iyang gilingkoran sa sulod sa iyang balay nga namalandong sa tanang gisulti kaniya sa matinud-anong Tri-Head Servant. May kalit nga kahiamgo nga inanay'ng miuliot sa iyang kaisipan.
"Husto si Joel! Husto siya...!"
Nakahukom si Bingbong. Motambong siya pagbalik sa tanang kalihokan sa Servant Community ug nakasaad siya nga pahugtan pa gayud ang iyang pagsalig, pag-ila ug pagtuo sa Ginoo, aron masinati niya ang milagrong grasya nga iyang giampo ug gipangayo. (Kataposan)