Gula 27
Nakugang si Rey Corpuz pagkadungog sa tingog ni Vonna -- sa cellphone -- nga ingon sa may gikahadlokan.
“Vonna, unsay problema?” Gipangutana niya ang doktora.
“Mahimo bang moari ka karon sa balay, Rey?” Misumbalik pagpangutana si Vonna.
“Nga-ngano man?”
“Nahadlok ko, Rey.”
“U-unsa?”
“May nakita kong mga tawo nga naglibotlibot sa gawas sa balay nga katingad-an ang mga lihok. Nahadlok ko. Tingalig mga daotan silang tawo ug ako’y ilang tuyo.”
“Sige, moanha ko karon dayon.”
Wala maglangan si Rey. Human sa panagsulti nila ni Vonna sa cellphone, mibiya dayon siya sa UCV Hotel and Casino. Sakay sa kaugalingon niyang awto, midiretso siya sa gipuy-an ni Vonna.
Apan nagmingaw ang palibot sa balay nga gipuy-an ni Vonna sa iyang pag-abot. Walay timailhan nga may mga tawo nga nagpahipi sa palibot.
Naabli ang gate nga puthaw alang sa sakyanan. Dihadiha nakita ni Rey si Vonna nga maoy nag-abli sa gate ug gisenyasan siyang ipasulod ang iyang sakyanan ngadto sa tugkaran sa balay. Dihadiha, gipasulod ni Rey ang iyang awto ngadto sa lagwerta sa balay sa dalaga.
Giserhan dayon ni Vonna ang gate. Paghikanaog ni Rey Corpuz sa iyang awto, miduol dayon si Vonna kaniya.
“Salamat nga nahiabot ka na, Rey,” nagkanayon si Vonna.
“Mingaw man lagi ang palibot?” Gikan ni Rey.
“Oo. Pero kaganina gikuyawan ko’g maayo sa mga anino nga akong nakita nga naglibotlibot sa balay.”
“Nanawag unta ka’g polis.”
“Wa koy pagsalig sa mga polis, Rey.”
“Vonna...”
“Pasayloa ko, Rey. Pero tungod sa ilang kapakyas pagdakop sa mga tawong nagpatay ni Daddy, inanay kong nawad-an og pagsalig nila.”
“Nakasabot ko’s imong gibati, Vonna. Pero maayo tingalig hatagan nimo’g benefit of the doubt ang kapolisan.”
Wala motubay si Vonna sa gisulti ni Rey. Giagda hinuon siya niini nga manulod sila sa balay. -- Sumpayan pa