Gula 26
Mibiya na si Rey sa atubangan sa batan-ong babaye nga naghatag kaniya og necrological service souvenir program. Milakaw siya tadlas sa taliwala sa chapel paingon sa nahimutangan ni Vonna nga nagbarog didto sa nahimutangan sa lungon ni Cong. Jovito Lazaro.
Nag-ukon-ukon pagduol si Rey dihang may tawo nga luho og panapot nga maoy nakaunag duol kang Vonna. Apan dihang nakita siya ni Vonna, gisenyasan siya niini sa pagduol. Maong miduol si Rey.
“Congressman,” ni Vonna pa. “Pag-ilaila mo sa akong higala.”
Unya gitudlo si Rey ni Vonna.
“Rey,” matud ni Vonna. “Si Cong. Gustavo Bacar, taga Mindanao.”
“Kumosta, Mr. Rey...” Mao ray nalitok ni Cong. Bacar.
“Corpuz,” pagpaila ni Agent 11-M sa kaugalingon. “Rey Corpuz.”
Human sa panaghimamat nila ni Rey ug Cong. Bacar, mibiya dayon ang congressman sa nahimutangan nila ni Rey ug Vonna. Gisundan kini’g tan-aw ni Rey hangtod nga nakapahimutang na kini sa usa ka lingkoranan tupad sa usa ka lalaki nga luho sab og panapot.
“Daghang tawo, no?” Giingnan ni Rey si Vonna.
“Oo,” tubag ni Vonna. “Ang kadaghanan nila mga supporters ni Daddy, mga kabanay, suod nga mga higala ug mga politiko, partikular na ang mga kauban niya sa kongreso.”
Igo lang miyango-yango si Rey.
Wala madugay, may mipahibalo nga sugdan na ang necrological rites. Nanglingkod sila si Rey ug Vonna nga nagtupad sa unang talay sa mga lingkoranan atubangan sa altar.
Human ikalubong si Cong. Lazaro, mibalik na si Rey sa naandan niyang gimbuhaton, ang paghimo’g imbestigasyon kalabot sa grupong Jehaddah Sellamiah nga gipangulohan ni Abaddon nga nakasulod na sa Sugbu.
Ang gusto niyang mahitabo mao nga may makatudlo unta kaniya sa dapit nga gilubloban sa grupo ni Abaddon sa Sugbu. Dakpon niya si Abaddon sa bisan unsang paagi--buhi man o patay!
Usa niana ka gabii -- mao pa gyu’y pag-abot ni Rey sa hotel nga iyang giistaran -- nanawag si Vonna kaniya. Nagkurog ang tingog ni Vonna, ingon sa nalisang pag-ayo. -- Sumpayan pa