Gula 55
Wala siya magdahom nga nasakpan ni James ang hilom nilang panagtagbo ni Allan kagabii sa lawak ni Nang Luding. Tingali kanunay gayod nga naniid si James sa iyang mga lihok mao nga nasayod kini nga mihinok siya sa pagpakigkita kang Allan.
“Naa si Nang Luding, James,” ni Denia pa. “M-makasaksi siya nga wala kami daotang gibuhat ni Allan. Nag-estorya ra mi.”
“Alang kanimo, wa kamoy gibuhat nga daotan,” matud ni James. “Apan alang kanako, daotan ang inyong gihimo tungod kay gisupak ninyo ang akong gibaod.”
“Pero unsa ba gyud ang hinungdan nga masuko ka man kun makigsulti ko ni Allan?” Na-feel ni Denia nga inanay nga nanginit ang iyang aping. “Tinuod nga sulugoon lang ko niining baya, pero dili kana igong katarongan nga imong gunitan ang akong liog. Wa kay katungod sa pagpanghilabot sa personal kong kinabuhi.”
Hait ang tinan-awan ni James kaniya. Nagtuo ang dalaga nga ingon sa wala kini magdahom nga mosukol siya sa pagpakiglalis niini.
“Nia ka sa poder sa mga Ricarte,” daw nagkagot ang mga ngipon ni James sa kapikal. “Dili ko gustong mabuysit kining among panimalay tungod sa paghimo ninyo’g tinonto. I want to make it clear, Denia. Dili ko gustong himuon ninyong motel ang panimalay sa mga Ricarte.” -- Sumpayan pa