Dili magsaba ang gaba

Kaburingog god nako og ulo Goyong, nga makigtrato kanimo, nga usa ka lang ka manananggot?" gitulisok ko si Goyong nga nangurso og pamisita kanako. "Mahimo kong sumsoman sa akong mga kahigalaan nga kauban ko sa trabaho, isip usa ka cashier, sa dakong mall, dinhi sa siyudad sa Sugbo!" Dili baya tiaw ang akong kaluoy nga nagsud-ong kang Goyong, nga sa akong tan-aw igo lang intawon nga miduko ug mihilak atubangan kanako.

"Siyaro sad Eser, sa katig-a sa imong kasingkasing nga mahigugma kanako, dili kana mopitik aron imo akong higugmaon ug mahalon!" hapit na lang moluhod sa akong atubangan si Goyong, nga nagbakho.

"Kuli kanang mahitabo Goyong?" mubo kong tubag kaniya.

"Bisan pa tingali ... kun kada oras ka maligo sa may dakong sapa sa atong balangay sa Lantawan ... dili gayod ako mokat-on nga mahigugma kanimo."

Sa akong hunahuna, nagmata lang gayod og buntag si Goyong sa gipatuo ko kaniya nga usa ako ka cashier sa mall. Kaha kun nasayran pa lang niya ang matang sa akong trabaho nga nagbaligya og unod sa mga foreigner, tingali tulin pa sa alas kuwatro nga dili na siya mopatim-aw pa nga mamisita sa among pinuy-anan.

Adlaw kadto nga Sabado. Wa ako moadto sa siyudad. Kanunay man god nga panugnawon ang kinatibuk-an sa akong kalawasan.

"Mas bintaha tingali Eser, nga imo nang ipatan-aw sa Doktor kun ngano nga kanunay ka man takigan, ilabi na sa panahon sa kagabhion?" dihay tuno sa kabalisa nga nagbakunkon og kabalaka ni Nanay Noring nga taudtaod nang nabiyudad kang anhing Tatay Masyong.

"Based upon my diagnosis and the result of your laboratory test ...positibo ka Miss Eser Manloloyo, nga nataptan sa sakit sa AIDS!" prangka ug way lipod-lipod nga mipadayag kanako si Dr. Bartolito Enciso, sulod sa iyang klinika ning among lungsod sa San Fernando.

Wa ko kalikayi ang pagbakho. Lakip si Nanay Noring, gibati usab og dili tiaw nga kahingawa sa akong sakit nga wa nay kaayohan.

"Magpaabot ka na lang Miss Eser Manloloyo, kun kanus-a ka kuhaa sa kahitas-an" dason nga pulong ni Dr, Bartolito Enciso.

Nakapanakla ako sa akong kaugalingon ug nagkanayon nga gipaagi ko lang sa paghagawhaw!

"Dili magsaba ang gaba ko kang Goyong, ning akong sakit nga wa nay kaayohan!" (Kataposan)