Nagtakoban nga pagbati

“Si James ba usab ang hinungdan nga nagdumili ka sa pagdawat sa akong gugma? Siya ba ang hinungdan, Denia?”

Wala makatubag si Denia. Apiki kaayo alang kaniya ang pangutana ni Allan.

“Nangulitawo ba usab si James kanimo, Denia?” Mipasupot si Allan og laing pangutana.

“W-wala,” mubong tubag ni Denia. “Ug kun mahimo, dili nato siya iapil sa maong isyu.”

“Kun wala siya mangulitawo nimo, nganong gidid-an ka man niya sa pagpakigsulti nako? Unsa may iyang labot sa imong kinabuhi?

Unsa may iyang concern alang kanimo?”

“Mao kana ang wala nako hisabti, Allan. Pero wala ko sa posisyon aron mangayo'g katin-awan ni James mahitungod nianang butanga. Ang gusto ko lang mahitabo mao nga makabaton ko’g peace of mind.”

“U-unsay buot mong ipasabot?”

“Gusto kong mohunong ka na sa pagpangulitawo nako.”

“D-Denia...?”

“Kini lang ang bugtong paagi, Allan nga magmalinawon ang akong kinabuhi. Kun mohunong ka sa imong tinguha nako. Nagtuo kong lung-an na usab ako sa paggukod ug pagpangapiki ni James.”

“P-pero...” -- Sumpayan pa

Oras mo na, Rey Corpuz!

Ni Uriel Cruz Vallecera

Sa gisulti ni Vonna, nasuta ni Rey nga espesyal gayod ang pagtagad niini kaniya. Tingali, taas ang pagtan-aw niini sa iyang pagkatawo kay gusto man kining ipaila siya ngadto sa amahan niining congressman.

“Mauwaw ko sa imong daddy, Vonna,” ni Rey pa nga nagpa-as if-as if.

“Buotan si Daddy, Rey,” nagkanayon si Vonna. “Nakaseguro kong magkasinabtanay kamo sa daghang mga butang, labina sa baroganan.”

Wala motingog si Rey.

“Next week mopauli na si Daddy dinhi sa Sugbu kay motak-op na man ang session sa Kongreso,” matud ni Vonna. “Pahibaw-on ko lang unya ka kun nia na si Daddy sa Sugbu aron magkakita mo.”

“Ikaw ang mag-igo, Vonna,” tubag ni Rey.

Dihang gihatod na sa service crew sa restaurant ang giorder nilang mga pagkaon, nangaon dayon sila si Rey ug Vonna. Samtang nangaon, nagpadayon ang ilang panagkabildo. Bisan unsa lang ang ilang gihisgotan.

Pagkaugma, sayong miadto si Rey sa gipuy-an ni Althea Moran nga nahimutang sa bukirang bahin sa dakbayan sa Sugbu.

Nahinangop pag-ayo si Althea pagkakita kaniya.

“Gisurpresa ko nimo, Rey,” ni Althea pa.

“Namawi lang ko,” ni Rey pa. “Sorry nga wa ta magkakita kagahapon.”

“Okey lang. Nakasabot ko. Duna kay importanteng misyon dinhi sa Sugbu nga kinahanglang imong tumanon kay mao kini ang imong trabaho.”

“Salamat sa pagsabot.”

Nagpahikay dayon si Althea og pamahaw alang nila ni Rey Corpuz. Ug samtang nagpaabot sila sa agda sa kusinera, misulod sila sa lawak sa babaye. Didto nahitabo ang mainiton nilang pagpinarayganay.

“Oh, Rey,” ni Althea pa nga gidutlan na sa gihimong pagana ni Rey. “I can’t find the words...!

“Let me try and enlarge your vocabulary,” hagawhaw nga tubag ni Rey.

Ug gipadayon nila ang init kaayong romansa. Hangtod nga gihingpit nila ang kalalim sa ilang pagpinarayganay pinaagi sa pagkatkat sa kinapungkayan sa ikapitong langit.

Nagdungan sila’g sangko sa kinatumyan sa kalalim. Pareho silang naghangos nga nahugno gikan sa makutas apan tugob sa sensasyon nga kombate sa ibabaw sa kama. -- Sumpayan pa