Gula 19
Si Doktora Vonna Lazaro ang nanawag sa cellphone ni Rey. Gitubag dayon niya ang tawag sa doktora nga iyang nahigala.
“Dili ka ba busy karon?” Nangutana si Vonna didto sa pikas linya.
“Busy og diyutay,” tubag ni Rey. “Ngano man diay?”
“Dapiton unta ka nako’g dinner unya. Pero kun dili ka makahigayon, okey lang.”
“Unsa may okasyon?”
“Wala lang gud. Gusto lang kong makigkita nimo. Makig-bonding.”
Wala motingog si Rey.
“Mahimo ba, Rey?” Misukna si Vonna.
“Unsang orasa?” Sumbalik pangutana ni Rey.
“6PM sharp. Sa Uriel’s Place.”
“Okey. Moadto ko.”
Human sa panagsulti nila ni Rey ug Vonna sa cellphone, gikuha niya ang iyang laptop. Gipahimutang niya kini sa ibabaw sa lamesa. May WiFi installation ang hotel nga iyang nahimutangan maong naka-online siya.
Gipasok dayon ni Rey ngadto sa slot ang CD nga gihatag ni A-Z kaniya. Gusto niyang utingkayon didto sa computer ang mga kasayoran nga nasulod sa maong CD. Wala siya maglisod pag-open sa CD didto sa computer.
Giutingkay niya ang tanang sulod sa CD. Ug nahingangha siya sa mga kasayoran nga nahisulod niini. Lawom kaayo ang mga impormasyon nga nakuha ni Double-One-A mahitungod sa mga teroristang iyang gika-engkuwentro didto sa parking area sa Segundo Mall.
Nakompirmar ni 11-A nga mga sakop gayod sa Jehadda Sellamiah ang iyang gika-engkuwentro. May mga Pilipino na diay nga na-recruit sa maong teroristang grupo. Ug si Abaddon maoy nangulo sa maong pundok dinhi sa Pilipinas. Nasulod usab sa CD lakip ang hulagway ni Abaddon.
Gi-upload ni Rey ang tanang impormasyon nga nasulod sa CD ngadto sa iyang YouTube account. Pagkahuman, gitak-opan niya ang laptop.
Alas singko sa hapon. Nangandam na si Rey sa iyang kaugalingon aron makigkita kang Vonna.
Dihang mobiya na unta siya sa hotel, mibagting ang iyang cellphone. Si Althea Moran ang nanawag. Iya kining gitubag.
“Moanha ko karon sa hotel nga imong giistaran,” ni Althea pa. -- Sumpayan pa