Gula 16
Pagkilab sa mga gutling, pareho nang walay salimbong ang mga lawas nila ni Rey Corpuz ug Althea Moran.
Dili kabalibaran ni Rey ang hagit nga giitsa ni Althea sa iyang pagka-lalaki. Humot kaayo si Althea nga presko kay bag-ong nakaligo.
Gisugdan dayon nila ang mainiton nga romansa. Pero nag-amping si Rey nga dili gyud matandog ang iyang samad sa abaga.
Dihang nanginit na sila’g maayo, gitambayonangan nila pagtaak ang paraiso sa himaya. Ug natagbaw ang naghingapin nilang kahinam dihang nagkadungan sila’g sangko sa kinapungkayan sa kalalim.
Pagkaugma, mibalik na usab si Rey ngadto sa tambalanan nga gialagaran ni Dra. Vonna Lazaro aron madresingan ang iyang samad sa abaga.
Si Vonna gihapon ang nangunay paghunad sa iyang samad. Ug mao gihapon kini ang gibuhat ni Vonna kaniya sa misunod pang mga adlaw sa pagpa-dressing ni Rey sa iyang samad.
Nagkasuod sila si Rey ug Vonna. Dili na matawag nga kaswal ang ilang pagtinagdanay sa usag-usa. Mora’g espesyal ang ilang paghinigalaay.
Nasayran ni Rey nga anak diay si Vonna ni Cong. Jovito Lazaro sa unang distrito sa dakbayan sa Sugbu.
Dihang hingpit nang naalim ang samad sa abaga ni Rey Corpuz, gipadayon na niya ang pagtuman sa iyang misyon. Dako na kaayo ang panahon nga iyang nausik tungod sa samad nga iyang naangkon gumikan sa iyang pagpakigsangka sa mga teroristang mipaulbo og bomba sa Segundo Mall.
Nabalaka si Rey nga tingalig maapsan siya sa panahon. Duol na ang ASTO Summit. Kinahanglang maposasan na niya si Abaddon sa dili pa ipahigayon ang ASTO Summit busa kinahanglang doblehon na niya ang iyang effort.
May mga higayon nga mobisita si Althea sa hotel nga iyang giistaran. Usahay sab, siya’y moadto sa gipuy-an sa dalaga. Mahitabo gyud ang pagkuha og dapit sa intimate moments basta magkakita sila.
May mga higayon sab nga dapiton siya’g paniudto ni Vonna. Walay kasayoran si Althea nga nagkasuod na pag-ayo sila si Rey ug Vonna.
Usa ka higayon niana, nakadawat og tawag si Rey Corpuz gikan ni A-Z, ang operations manager sa 9mm. -- Sumpayan pa