Oras mo na, Rey Corpuz!

Gula 15

Si Althea Moran diay ang didto sa sulod sa banyo sa suite ni Rey Corpuz. Nakugang ug nalisang kini pagkakita nga gition ni Rey ang armas nga iyang gigunitan ngadto niini.

Gidali pagpaubos ni Rey ang iyang armas dihang nasuta niyang si Althea diay ang didto sa sulod sa banyo. Naligo kini.

“Ngano bang misulod ka man dinhi?” Nakaingon si Rey. “Sus, kun gipabuto pa dayon nako ang akong armas, napatay ko na unta ka.”

“I’m sorry, Rey,” ni Althea pa. “Gusto man lang unta gud ka nakong surpresahon.”

“Nakalitan gyud ko, Althea, dihang pagsulod nako sa lawak akong namatikdan nga may tawo sulod sa banyo. Gipakaingon ko’g kaaway na ang misulod sa akong suite nga walay pananghid.”

“Nasuko ka ba nako, Rey?”

“Wa man. Pero ayaw na kadto’g usba. Nasayod ka na baya sa akong trabaho. Tingalig panimaslan ko sa mga sakop sa Jehadda Sellamiah tungod sa ilang mga kauban nga akong napatay.”

“Sorry kaayo, Rey. Promise...dili na kadto mausab.”

Nahilom sila sa makadiyot.

“Maayo kay gitugotan ka sa management ning hotel nga makasulod ka sa akong suite?” Gibuak ni Rey ang kahilom pinaagi sa pangutana.

“Gigamit nako ang akong impluwensiya,” tubag ni Althea.

“Unsay buot mong ipasabot?”

“Higala nako ang tag-iya ug tagdumala ning hotel. Ang iyang anak kanunay nakong ikauban sa pagdula og golf. May pagsalig siya nako. Gawas pa, ang mga tig-alagad ning hotel nakaila sab nako. Ug nakita ko nilang kauban nimo kagahapon. Mao nga bisan sa kaestrikto sa patakaran ning hotel, nakalusot ko. Nasayod silang di ko daotang tawo.”

Wala na lang mo-ik si Rey.

“Diin ka man diay gikan?” Nangutana si Althea.

“Sa tambalanan,” tubag ni Rey. “Nagpa-dressing ko sa akong samad.”

Unya, ingon sa kalit lang nahimong romantiko ang mga gutlo. Nagtinutokay sila si Rey ug Althea. Samtang nagbag-iray ang ilang panan-aw, gipanangtang ni Althea ang mga butones sa long-sleeved nga gisul-ob ni Rey. -- Sumpayan pa