Don't leave me alone

Nahunong ko paglakaw. Kalit nga mikuba ang akong dughan. Wa ko madayon sa pagsulod sa boarding house nga akong gisak-an kay maoy akong nakita si Nico nga migawas sa kasikbit nga boarding house para sa mga lalaki. Nagdala siya’g dakong travelling bag.

"Nico!" Gitawag ko siya. Wa siya makamatikod nako. Milingi siya pagkakita niya nako, miduol siya. Subo ang iyang nawong.

"Mopauli na ko sa ato, Angeli. Nasakit si Papa Roberto. Di na ko makaeskuyla."

Katagilungsod ko si Nico. Mag-uuma ang iyang parents sa gamay nilang yuta sa bukid. Namuhi sab silag mga hayop aron makatabang sa paggasto kang Nico sa pag-eskuyla sa college.

"D-Don't leave me alone. Di ko kaya nga di ka magkauban dinhi." Kahilakon ko.

"Kinahanglang mahitabo kini, Angeli. Di na matuman ang akong gisaad nimo nga di tika biyaan nga mag-inusara dinhi sa siyudad."

"Unsa bay sakit sa imong papa?"

"Kanunay magsakit ang bukobuko. Kinahanglang ako na ang mangunay sa pag-atiman sa among uma ug sa mga binuhi namong hayop. Tiguwang na sila si papa ug mama. Nasayod ka na sab nga ako ang kamaguwangan namong tulo ka magsuon."

Gianugnan ko sa pag-undang ni Nico sa pag-eskuyla. Maayo siya sa klase. Apan wa koy nahimo. Kinahanglang moundang siya sa pag-eskuyla tungod sa nahitabo sa iyang amahan.

Wa ko lang mamatikdi ang kusog nga pagpangabot sa daghang mga adlaw. Nakahuman na ko sa kursong Political Science. Aduna na say maayong trabaho.

Usa ka Domingo, nagpalit kog isda sa merkado sa among lungsod. Every weekend ko mopauli kay sa siyudad man ko nagtrabaho. Nagkita kami si Nico nga nagpalit sab og mga kinahanglanon sa ilang balay.

"Kumosta ka na, Angeli? Misamot ka kaguwapa karon?"

"Nia, guwapa gihapon." Mikatawa ko. "Ikaw? Karon pa gyod kita nagkita. Busy ka tingali kanunay sa pag-uma."

"Oo, Angeli. Tua na ko magpuyo sa bukid. Panagsa ra ko moanhi sa lungsod."

Naitom man tuod si Nico tungod sa kainit sa adlaw, apan nabus-ok ang iyang lawas. Ug misamot siya kaguwapo. Dark, tall and handsome. Nanglabay pa ang mga adlaw. Daghan ang nangulitawo nako apan gi-basted ko sila. Usa ra ang lalaki nga akong love. Ug nagpaabot ko nga iyang pangulitawhan.

Nanglabay pa ang mga adlaw. Malipayon ko usa ka gabii. First night namo ni Nico. Nahiabot gyod ang dugay kong gihulat. Gipangulitawhan ko ni Nico. Gisugot ko siya ug gikasal dayon kami.

"Don't leave me alone, Nico. Di ko mosugot nga di mo ako ubanan sa giabangan kong apartment sa siyudad." Migakos ko sa akong bana. Sa balay ni Nico kami natulog.

"Di na tika biyaan nga mag-inusara sa siyudad, Angeli. Ning higayona, tumanon ko na kini."

Gipalong ni Nico ang suga sa kuwarto. Nahilom kami. Unya gihagawhawan ko siya. "Way biyaay."

"Oo, Angeli. Way biyaay."

Nakatulog ako nga malipayon nianang pagka kaadlawon na. (Kataposan)