Oras mo na, Rey Corpuz!

Gula 12

Gipasabot ni Rey Corpuz si Doktora Vonna Lazaro nganong gusto na siyang mogawas sa tambalanan.

“Dili grabe ang akong samad,” ni Rey pa. “Puyde man tingali nga sa akong gipuy-an na lang ko magpakaalim sa hingpit.”

“Mahimo man, Mr. Corpuz,” matud ni Dra. Lazaro. “Total, dili man talandogon ang imong kahimtang. Pero kinahanglang moanhi ka sa tambalanan matag adlaw alang sa dressing sa imong samad.”

“Okey lang kun moanhi ko matag adlaw. Ang importante nga dili ko mag-stay dinhi. Dili ko komportable.”

“Ikaw ang mag-igo, Mr. Corpuz. Nakasabot ko sa imong tumong. Walay tawong ganahan magpuyo sa hospital -- kun mahimo lang. Boring kaayong puy-an ning lugara.”

Naputol ang panagsulti nila ni Rey ug Dra. Lazaro dihang misulod si Althea nga nagdala sa pinalit niining mga pagkaon.

Nianang pagkabuntag, mi-check out dayon si Rey Corpuz sa hospital. Gikuyogan siya ni Althea Moran ngadto sa UCV Hotel and Casino nga iyang giistaran.

Bisan og may kakulian pa sa lawas, miandar gihapon ang pagkadukirok ni Rey sa babaye. Samtang naglingkod siya sa ngilit sa kama, iyang gikawhat ang tuong kamot ni Althea ug gipalingkod kini sa iyang tupad. Iyang gihagkan ang aping ni Althea ug dayon gisimhot ang buhok niini.

“Kahumot gyud nimo, uy,” hagawhaw ang tingog ni Rey.

“Nagpahumot ko kanunay aron dili ka pul-an nako,” ni Althea pa.

Gigakos ni Rey si Althea gamit ang usa niya ka kamot. Dili pa man makapangusog ang iyang walang kamot nga koneksiyon sa abaga niyang may samad. Gipahigda niya si Althea sa ibabaw sa mahunolhunol nga kama.

“Mabughat gani ka,” ni Althea pa nga daw mabalak-on ug nakasabot sa gusto niyang mahitabo tali kanila.

“I can manage,” nagkanayon si Rey dayong halok sa ngabil sa babaye.

Wala na mo-ik si Althea. Mipaundayon na lang kini sa gibuhat ni Rey. Nagtinal-opay ang ilang mga ngabil sa pinadulot nga hinagkanay. Mialalay si Althea kang Rey aron dili matandog ang iyang samad sa abaga.

Dihang nanginit na sila pag-ayo, gitambayayongan nila pagkatkat ang hagdanan ngadto sa ikapitong langit. -- Sumpayan pa