Oras mo na, Rey Corpuz!

Gula 11

Hapit nagkadungan paglingi sila si Rey Corpuz ug Althea Moran ngadto sa pultahan. Maoy nasugat sa ilang panan-aw ang usa ka nurse nga misulod. Miduol kini sa ilang nahimutangan.

“Good evening, Mr. Corpuz,” mitimbaya ang nurse kang Rey ug mipasiplat usab kini ngadto ni Althea. “Tomara una ning imong tambal.”

Gilamoy dayon ni Rey ang tambal nga gihatag sa nurse kaniya nga gipatabanan og tubig.

“Daghang salamat, Nurse,” ni Rey pa human makatomar sa tambal.

“You’re welcome, Mr. Corpuz,” sa nurse pa nga mapahiyomon.

Migawas dayon ang nurse sa lawak nga nahimutangan ni Rey Corpuz.

“Ugma sa buntag mo-check out na ko, Althea,” nagkanayon si Rey.

“Maayo’g mosugot ang doktor nga nag-atiman nimo?” Gikan ni Althea.

“Gamay ra ning akong samad. Layo ra nis patyanan.”

“Aw, ikaw gud.Sige, pakigsultihan ko ang doktor nga maoy imong attending physician.”

Unya gipatipas nila sa laing tema ang ilang panagkabildo. Hangtod nga nananghid si Althea kang Rey nga mogawas una siya’g makadiyot sa hospital.

“Magpalit ko’g pagkaon,” ni Althea pa.

“Sige,” ni Rey pa.

Migawas si Althea sa lawak nga nahimutangan ni Rey. Wala madugay sukad sa pagbiya niini, naabli ang pultahan sa lawak. Misulod ang usa ka maanyag nga babaye nga nagbiste og puti. May stethoscope nga nagbitay sa liog niini. Miduol ang babaye sa hospital bed nga iyang gihigdaan. Mipahiyom kini kaniya.

“Hi!” Timbaya sa babaye kaniya.

“Hello!” Mao ray gitubag ni Rey.

“Ako si Doktora Vonna Lazaro,” paila sa babaye kaniya. “Ang imong attending physician. Kumosta ka na, Mr. Rey Corpuz?

“M-maayo man,” tubag ni Rey. “Salamat sa imong pag-atiman nako.”

“You’re welcome.”

“Mahimo bang mogawas na ko ugma dinhi sa hospital, Dra. Lazaro?”

Wala motingog ang doktora. Igo lang kining mitan-aw kang Rey Corpuz. -- Sumpayan pa