Oras mo na, Rey Corpuz!

Gula 10

Gibati ni Rey ang tumang kasakit sa samad sa iyang abaga nga naigo sa pagpusil sa kaaway. Apan bisan og naunhan siya sa kaaway, nakahimo pa gihapon siya pagbalos. Ug napatay niya ang kaaway nga mipusil kaniya.

Taudtaod nabati ni Rey ang andar sa usa ka sakyanan. Misuhid si Rey sa palibot sa parking area. Nakita niya ang usa ka sakyanan nga nagdagan. Naabli ang bentana tungod sa driver’s seat niini ug gipusil siya sa tawong nag-turban nga nagsakay niini.

Maayo gani kay abtik nga nakapasalipod si Rey. Nakalikay siya sa naghagiyos nga mga bala nga gibuga sa armas sa kaaway.

Ang gisakyan sa kaaway milahos paggawas sa parking area. Gipasundan kini’g pusil ni Rey apan wala kini niya maigo. Wala na lang gukda ni Rey ang kaaway nga mipalayo. Gibati niya nga misakit pag-ayo ang samad sa iyang abaga. Miping-it si Rey.

Paglabay sa pipila ka gutling, may nangabot nga mga polis nga sakop sa Mobile Patrol Division.

Tungod sa samad nga nahiagoman ni Rey, nahilandig siya sa tambalanan. Nahikatulog siya human maatiman sa babayeng mananambal ang iyang samad.

Pagmata ni Rey, nakugang siya kay diha na si Althea Moran sa iyang kiliran.

“Giunsa mo pagkasayod nga nia ko dinhi?” Nangutana si Rey.

“Nabalitaan nako sa TV,” tubag ni Althea. “Nagtan-aw ko kaganina sa Wowowee. Gi-flash report ang nahitabong pinusilay didto sa Segundo Mall. Nabalaka ko pagkasayod nga ikaw ang gika-engkwentro sa mga terorista ug nasamdan ka ug nadala sa tambalanan.”

“Layo ras tinai ning akong samad.”

“Salamat sa Dios nga dili grabe ang samad nga imong naangkon.”

“Kinahanglang makagawas na ko dinhi, Althea. Dili mahimong magdugay ko dinhi sa tambalanan kay tingalig matultolan ko sa mga kaaway. Nasayod kong daghan pag mga kauban kadtong mga terorista nga akong napatay.”

“Pero luya ka pa.”

“Makasugakod na ko.”

Naputol ang ilang panagsulti dihang sa kalit lang naabli ang pultahan sa lawak nga nahimutangan ni Rey. -- Sumpayan pa