Nagtakoban nga pagbati

Gula 38

“Ambot lang. Basta kay gitugon ko niya nga pasultihan ka nga gusto siyang makigsulti nimo sa dili pa siya mogikan paingon sa opisina. Magpaabot kuno siya nimo sa music room.”

“Karon na ba, Nang?”

“Tua pa siya sa iyang lawak nagkaon. Banabanaa lang nga mahuman siya’g kaon ayha ka pa moadto sa music room.”

Nahilom si Denia. Gisulayan niya’g pangagpas kun unsay buot pakigsultihan ni James kaniya. Pero wala gayo’y bisan diyotay na lang ideya nga misantop sa iyang hunahuna.

Humok ang seradora sa pultahan sa music room sa dihang iya kining giliso. Nasuta ni Denia nga may tawo na sa sulod.

Mituktok siya’g makatulo sa palid sa pultahan. Wala na niya paabota nga may moabli sa pultahan o may motubag didto sa sulod. Gihinay niya’g tukmod ang palid sa pultahan ug misulod.

Naabtan niya si James nga nagdula sa piano. Mihunong kini pagtulpok sa mga key sa piano pagkamatikod niini sa iyang pagsulod. Gilig-on ni Denia ang iyang kaugalingon.

“Gitawag man kuno ko nimo?” Wala masayod si Denia kun diin siya mokuha og kaisog sa iyang pagharong sa tinan-awan ni James kaniya.

“Tinuod kana,” mubong tubag sa ulitawo.

“May isugo ka?”

Wala motingog si James. Mibalik hinuon kini pagdula-dula sa piano. -- Sumpayan pa