Gula 7
Usa ka higayon niana, samtang nagtan-aw si Rey Corpuz sa haponong balita sa telebisyon sulod sa iyang suite sa five star hotel-- ang UCV Hotel and Casino -- nga iyang giistaran, maoy nag-una sa mga balita ang gikatahong hulga nga bombahan ang Palace of Justice sa Mandaue City.
Sumala pa sa balita, mga bag-ong recruit sa Moro Islamic Liberation Front (MILF) ang naghugonhugon sa pagpamomba sa palasyo sa hustisya. Tungod sa maong hulga, gipalihok dayon sa Police Regional Office (PRO-7) ang tanan nilang intelligence units aron ma-trace kun kinsa kadtong nagpadala sa sulat nga nanghulgang bombahan ang palasyo sa hustisya.
Naikag si Rey pagsunod sa maong balita, labina nga nalambigit niini ang MILF. Nakadawat man gud siya’g taho nga posibleng magtambayayong ang MILF ug Jehadda Sellamiah aron paglawgaw sa nagsingabot nga ASTO Summit nga ipahigayon sa Sugbo.
Maong pagkaugma, sa samang oras, gibuksan ni Rey ang telebisyon sulod sa iyang suite. Gusto siyang makakuhag update mahitungod sa gikataho nga bombahan ang Palace of Justice sa Mandaue City sa mga sakop sa MILF. Namasin siyang makakuha’g anggulo nga ikakonektar sa iyang misyon.
Tuod man, may update gyud bahin sa balita nga bombahan ang palasyo sa hustisya sa Mandaue. Na-trace na sa kapolisan ang nagpadala sa sulat nga nagpahibalo nga bombahan ang palasyo sa hustisya. Usa lang diay ka tawo nga may kasong large scale estafa sa usa sa mga sala sa maong Palace of Justice ang responsable sa pagpanghulga. Nadakpan na sa mga tinugyanan sa balaod ang maong tawo. Ug dili siya tinuod nga sakop sa MILF. Gigamit lang niya ang ngalan sa maong grupo sa pagpanghulga.
Nakapanglingo si Rey sa iyang nasayran. Nakaingon siya sa hilom nga ang maong tawo nagdugang lang sa iyang problema ug tulobagon sa balaod tungod sa iyang gibuhat.
Matag adlaw naglihok si Rey aron pagtuman sa iyang misyon. Nagkaduol na ang ASTO Summit kay kinahanglang maposasan na niya si Abaddon sa dili pa moabot ang adlaw sa pagpahigayon sa maong kalihokan. Mao kini gipasalig sa ilang ahensiya ngadto sa buhatan sa Presidente sa nasud.
Usa ka higayon niana, misuroy si Rey sa Segundo Mall. Dihang gibati niya ang pagpanginahanglan pagtubag sa sugo sa lawas, miadto siya sa CR. Sa iyang pagsulod, gikadungan niya ang usa ka lalaki nga nagdala og bag. -- Sumpayan pa