Gula 36
Dili lang siya makaprangka sa pagsulti kang Allan sa tinuod. Maikog siya. Dili siya gustong masakitan ang ulitawo tungod kay buotan kini kaniya.
“Sagdi lang, Den,” ni Allan pa sa maluyahon nga tingog,” kun ang akong pagpaabot moresulta lang sa wala, dili ko igsapayan ang pag-usik nako sa akong panahon kay giusikan ko man kini alang kanimo.”
Wala makatingog si Denia, dihay bahin sa iyang balatian nga natandog sa gisulti ni Allan. Mibati na hinuon siya’g kaluoy sa ulitawo.
Pero ang kaluoy dili igong basehanan sa gugma. Dili kini igong katarongan aron dawaton na lang niya ang gugma sa ulitawo. Kun sugton niya si Allan bisan wala siya mahigugma niini sa tinuoray, sama ra sa gi-torture niya ang iyang kaugalingon.
Ang tinuod, sayon ra unta kaayo alang kaniya ang pag-decide kun si James pa lang ang nangulitawo kaniya. Segurado na siya sa iyang gibati kang James. Ugaling lang kay dili man si James ang naninguha kaniya. Si Allan man hinuon ang nangulitawo kaniya dili mahimong iyang higugmaon tungod kay hinigala lang ang iyang pagtagad ngadto niini.
“Anaa ra kanimo ang tanan, Allan,” ni Denia pa. “Basta kay wala ko ikaw pasaligi. Sublion ko sa pag-ingon nga dili ko gustong molaom ka.” -- Sumpayan pa