Walay kalinaw sa tanlag

Papa, pasayloa ako nga dili na mokuyog kanimo sa pagpanagat hangtod sa hangtod, prangka ko nga sulti ngadto kang Papa Fred nga nangandam na sa pag-adto sa dagat.

“Ngano man Romeo? Nganong dili ka na man mokuyog kanako hangtod sa hangtod?”, matud ni Fred nga nahibulong.

“Dili na ako mokuyog kanimo hangtod sa hangtod Papa kun dili ka mohunong niining imong gidili nga paagi sa panagat. Sama sa panagat ginamit ang dinamita”, matud ko nga mipasabot kang Papa Fred.

“Pero, Rom wala na akong nakita karon nga paagi aron mabuhi kita ug makagasto kanimo sa pagtungha sa kolehiyo,’ matud ni Fred nga nangatarongan.

“Anaa pay daghang paagi Papa Fred nga mabuhi kita nga dili mosupak sa balaod sa atong nasudnon nga kagamhanan. Pananglit, atong ugmaron ang pansil ta nga yuta sa bukid. Ug ato nga tanoman og mais, mga lagutmon ug utanon. Unya mamuhi pa gyod kita og mga kahayupan sama sa baboy, manok, kanding, itik, baka ug kabaw,” matod ko nga mikombensir gayod pag-ayo ni Papa Fred.

“Apan, Rom kapoy kaayo na nga matanga sa panginabuhi,” matod ni Papa Fred.

“Oo, tinuod kana Papa. Apan nianang matanga sa panginabuhi wala kay tawo nga giligsan. Kining matang karon sa atong panginabuhi dali ra ang kwarta. Apan, wala kitay kalinaw sa tanlag. Kay mahadlok man kita nga masakpan sa mga tinugyanan sa balaod. Ikaw ug ako Papa swerte pa kita nga nakapahimulos sa bahandi sa kadagatan. Apan, mag-unsa na man lang unya ang akong mga anak ug sa mga anak pa sa akong mga anak ugma damlag. Nga imo na man nga giguba ang mga kagasangan ug kabatoan diin maglublob ang mga isda sa kadagatan and other marine life? Aduna na kaha sila’y isda pa nga makaon?,” matud ko nga mipasabot pag-ayo ni Papa Fred.

Niining higayona si Papa Fred wala na motubag kanako. Hinunoa, miduol siya kanako ug migakos. Unya minga-ab siya sa paghilak ug sa malanog nga tingog nagkanayon, “Pasayloa intawon ako sa akong mga kasaypanan, Rom.” (Kataposan)