Oras mo na, Rey Corpuz!

Posasan unta si Rey Corpuz sa usa ka polis apan gibadlong kini sa laing polis. Maong wala mahinayon ang pagposas kaniya.

“Dili nato siya kontra, PO1 Palmero,” nagkanayon ang polis nga maoy misanta sa pagposas unta kang Agent 11-M. “Dili ta siya kontra. Wa ba nimo makita nga mitabang siya kanato sa pagpakigsangka sa mga kaaway kaganina?”

“Sorry, Sir,” mao ray nasulti ni PO1 Palmero.

Wala molugak sa paggunit ni Rey Corpuz ang duha ka polis nga maoy nisignit ni Rey kaganina. Mipaduol kaniya ang polis nga gisangpit og “sir” ni PO1 Palmero.

“Kinsa ka?” Nangutana ang polis nga gisangpit og sir kaniya. “Pagpaila sa imong kaugalingon kanamo.”

“Ako si Rey,” tubag dayon ni Agent 11-M. “Rey Corpuz.”

“Mora’g pamilyar nako ang imong ngalan,” niingon ang polis.

“Ambot lang. Mora’g dili ko ingon niana ka-celebrated,” tubag ni Rey.

“Sir,” dihay laing polis nga miduol kanila.

Milingi ang polis nga gisangpit og sir. Gihunghongan kini sa polis nga miduol. Pagkahuman, mibalik og atubang kang Rey ang polis nga gisangpit og “sir” sa mga kauban niini.

“Agent Double-One-M?” Sukit sa polis.

“Yes,” tubag ni Rey. “Nag-alagad ko sa 9mm Intelligence and Detective Agency nga deputized na karon sa PSIB sa Her Excellency Secret Service.”

Dihadiha gisenyasan sa polis nga gitawag og “sir” ang duha ka polis nga nagbinaklid paggunit kaniya sa pagbuhi kaniya. Dihadiha gilugakan siya sa duha ka polis.

“Ako si Chief Inspector Ringo Cortez sa Mobile Patrol Division,” nagpaila ang polis nga gitawag og sir ngadto ni Rey Corpuz. “Sorry sa dili maayong tratamiyento namo kanimo kaganina. Naniguro lang mi maong amo kang gidis-armahan.”

“Okey lang,” ni Rey pa. “Mao gyud kadto'y angay ninyong buhaton.”

Giuli sa kapolisan ang armas ni Rey. Nagsultihanay sila’g makadiyot si Chief Inspector Cortez. Unya mibalik na si Rey sa nahimutangan ni Althea dihang iyang namatikdan nga nangabot na ang taga media nga nakatimaho sa nahitabong pinusilay. -- Sumpayan pa