Taho vendor si Papa Bador

Ning buntaga, nasiklapan ko na usab si Papa Bador nga malipayong misulod sa campus sa among publikong eskuylahang elementarya dinhi sa siyudad nga nagsinangay sa duha ka dagkong baro, nga gisudlan sa gitindang taho ug sa mga himan nga templada ug taksanan sa lamiang taho nga nahimong kinaham na sa kabataan sa among eskuylahan matag recess time.

"Tahooo! Tahooo...!" lanog nga singgit ni Papa Bador nga mapahiyumong mianinaw sa kabataan sa sulod sa campus. Nagdinaganay dayon ang mga tinun-ang kabataan, lakip na ang akong klasmeyt ngadto sa akong amahan. Nakapahiyom sab ko nga milingi kang Mam Milagring, ang among adviser nga maestra sa Grade Six Section One ug mapagarbuhong misinggit ngadto sa guwapa namong maestra.

"Si Papa Bador, Mam! Ang taho vendor kong amahan...!"

Dinhi sa among barangay, sa eskuwater nga dapit sa siyudad, garbo nako si Papa Bador, tungod sa gipakita niya nga talagsaong kakugi sa pag-amuma ug pagbuhi kanako, gikan sa gamay pa kong bata, hangtod nga mitungtong na ko karon sa 12 anyos ug mogradwar na sa Grade Six.

Wala ko makaila sa akong inahan, nga matud pa ni Papa, mibiya kanamo samtang unom pa lamang ka bulan, human ko ihimugso. Mibiya kuno ang akong inahan kang Papa kay dili kontento sa nagkabikosbikos nga panginabuhian sa akong amahan ug mikuyog og laing lalaki paingon sa Manila. Sa sinugdanan god, usa man lang ka yanong kargador si Papa Bador sa pantalan. Apan salamat nga iyang nakaila si Sir Pat Georsua, usa ka malampusong negosyante sa siyudad nga maoy tag-iya sa usa ka factory nga tiggama og lamiang taho sa siyudad sa Sugbo nga maoy labing himalitan karon, tungod kay hilabihan ka lamian ang templa niini. Ug tungod kay maayong tawo si Sir Pat Georsua ug maloloy-on sa mga kabos, gidawat ug gihimo niyang usa ka tindero si Papa Bador sa lamian niya nga taho. Nahimong taho vendor si Papa Bador ug hingpit niyang gibiyaan ang pagpangarga sa pantalan.

Ug dinhi magsugod nga nahimong haruhay na ang kahimtang namo ni Papa Bador, gumikan sa iyang pagkataho vendor. Nakasuwerte sab ang akong amahan kay nahimo man niyang suki ang kabataan sa among eskuylahan gikan sa Grade One ug hangtod na sa Grade Six ug pasudlon pa gyud siya sa among prinsipal sa campus.

Lalim bay espoko, nga labing menus, molimpiyo sa iyang kinitaan ang akong amahan og kuwatro sentos pesos, nga kutob lang sa alas 4 sa hapon. Tagduha ka baro ang mahurot sa pagsuroy ni Papa Bador sa gitinda niyang taho. Usa ka baro sa buntag panahon sa recess time ug laing usa ka baro inigkahapon nga recess time.

Ug sulod sa napulo na ka tuig ni Papa Bador nga pagka-taho vendor, dako na ang kantidad nga kuwarta nga iyang natigom sa BPI Family Savings Bank sa dalan Colon.

Basta, naharuhay gyud ang among kahimtang sa pagka-taho vendor sa akong amahan. Hitsas ug sakto gyud ang akong alawans sa eskuylahan. Napalitan ko ni Papa og nindot nga mga sapot ug sapatos. Ug abi ninyo, lakip ang guwapa kong maestra nga dalaga, si Mam Milagring, nahimong suki sa lamian nga templada sa taho nga gisuroy ni Papa Bador, matag buntag ug hapon.

"Dong Al, payits gyud sa pag-eskuyla, ha? Pagbinuotan gyud, kay gastohan tika sa pagpalampos og eskuyla gikan sa hayskol ug kolehiyo...!" kini ang kanunay nga ipahinumdom kanako sa taho vendor kong amahan.

Ug ning buntaga, nagmiramira pa si Papa Bador sa iyang mga kamot ngadto ni Mam Milagring nga migula na sa gate sa among eskuylahan, kay nahurot na ang sulod nga taho sa gisinangay niyang baro. Nakapahiyom ko. Sa iyang pagka-taho vendor, garbo ko si Papa Bador. (Kataposan)