Oras mo na, Rey Corpuz!

Sulod sa mabugnaw’ng lawak sa hamugaway nga panimalay ni Althea Moran mabati ang daw pinugngang hangos ug agumod sa duha ka binuhat nga nagsawo sa pagtagay sa kalalim sa lawasnong kalipay.

Walay tihiktihik ang mainiton nilang panagtigi sa bugno sa kama. Ang babaye nagpabatang pag-ayo sa ilawom sa lalaki. Gisangga niya sa pag-alig-ig ang lalaki nga lihokang nagsaka-kanaog sa ibabaw sa hubo niyang lawas.

“Paspasi, Rey,” hagawhaw ang tingog ni Althea nga naghangos.

“Take your time,” matud ni Rey Corpuz. “Akoy bahala.”

Bag-o lang nahibalik si Rey sa Sugbu gikan sa Manila. May lain na usab nga misyon nga gisangon ang 9mm Intelligence and Detective Agency kaniya. Siya’y gitahasan pagdakop kang Abaddon, ang pangulo sa teroristang grupo nga Jehadda Sellamiah nga gikatahong nakasulod na sa Sugbu aron paglawgaw sa nagsingabot nga Asian Tourism (ASTO) Summit nga ipahigayon sa Sugbu ug pagatambongan sa dagkong mga lider sa mga nasud sa Asia.

Gipalambo og maayo sa 9mm ang ilang panerbisyo ngadto sa katawhan. Aron makabaton og mas lig-on nga sukaranan sa pagpangalagad ug pagpalapad sa ilang serbisyo, gi-deputize na kini sa Presidential Security and Intelligence Bureau (PSIB) sa buhatan sa Presidente sa Pilipinas. Duha ka double-one agents sa 9mm ang gipadala sa Sugbu alang sa usa ka dakong misyon. Usa na niini si Rey Corpuz nga mas nailhan sa ilang ahensiya nga si Agent Double-One-M.

Kay nia na man gayod siya sa Sugbu, gipahimuslan na lang ni Rey ang pagpakigkita kang Althea, ang kanhing kliyente sa 9mm nga gitabangan niya aron malimpiyo ang ngalan sa negosyo niini nga nahilambigit sa anomaliya. Kay daan na man nga may escapades together sila si Rey ug Althea, misangko gyud sa intimate moments ang ilang panagkita.

Tugob sa kainit ang ilang pagtagay sa lawasnong kalipay. Dihang nagkadungan sila pagsangko sa pungkay sa himaya, matagbawon silang nahugno gikan sa makutas nga kombate.

Human sa matagbawon nilang panagsawo sa lawasnong kalipay, nagkasabot sila si Rey ug Althea nga manuroy. Nanggikan dayon sila sakay sa Lincoln Navigator ni Althea. -- Sumpayan pa