Kusog kong midagan. Mingaw na. Lawom na ang gabii. Apan may nag-inom pa nga mga bugoy sa gamay nga tindahan sa gipuy-an kong eskuwater sa siyudad. Nagkatawa ang mga bugoy nga nagtan-aw nako nga nalisang. Gipasagdan ko sila.
Milingi ko. Nagsunod si Mama Magda nako. Masuk-anon nga nagpanawag sa akong ngalan. Misamot ang akong kahadlok. Midagan ako ug midagan. Nahiabot ako sa ngitngit nga dapit. Misamot ang akong kalisang. Apan kinahanglan makalayo ko sa amo.
Samtang nagdagan ko sa kangitngit, morag nadungog ko pa ang malipayong tingog ni Mama Magda nga nahiabot sa among payag. May kauban siyang tigulang nga lalaki. Naniga ang mga mata nga nagtan-aw nako.
"Siya ba ang imong anak? Kaguwapa niya og presko pa. Batan-on kaayo. Siya ang akong ampay!"
"Oo, siya. Sige na, bayri na ko!"
Nagpabuhot si Mama Magda sa aso sa iyang sigarilyo. Gikan pa siya sa beerhouse sa siyudad nga iyang gitrabahoan. Bisan hamtong na siya, apan gidawat gihapon siya sa tag-iya sa beerhouse isip G.R.O. Mubo kaayo siya’g sinina. Namula ang nawong sa bagang make-up ingon man ang iyang mga ngabil.
Nakasabot ko sa ilang mga lihok. Nahadlok ko nga mibangon sa gihigdaan kong gision nga banig.
"Kinse anyos pa siya. Dad-on ko siya ugma sa gabii sa beerhouse. Apan ikaw ang akong paunahon kaniya kay ikaw ang labing dakog tip nga mohatag nako sa tanan kong kustomer."
Misamot ang akong kahadlok sa gisulti sa akong inahan. Nagdako ako nga way nailhang amahan. Wa ko paeskuylaha sa akong inahan. Gusto niya nga mahisama ko kaniya, mahimong G.R.O.
Dako kaayog katawa si Mama nga midawat sa papel de banko nga gihatag sa lalaki nga iyang kauban. Gipahimuslan ko ang higayon. Nagdali kong migawas sa among payag. Midagan ko og kusog. Gigukod ko sa akong inahan. Labihan ang iyang kasuko.
Apan wala ko siya tagda. Nagpaninggit siya.
"Hoy! Ayaw paglayas! Way utang kabubut-on! Ayaw ko supaka kay ako ang nagpakaon nimo!"
Milingi ko. Nagpadayon pagpaninggit si Mama. Nagpadayon siya paggukod nako. Apan bisan pa sa kangitngit, nagpadayon ako pagdagan. Usahay masukamod ko. Mapandol. Apan wala ko tagda ang mga samad sa akong lawas. Maoy akong tinguha nga mahilayo kang Mama. Sa among dapit sa lang-og nga eskuwater.
Gipaningot na ko pag-ayo. Gibati ko ang kakapoy. Hapit na mag-abot ang akong ginhawa. Apan nagpadayon ko sa pagdagan. Layo na ang akong naabtan. Wa na ko masayod kun unsa nang lugara ang akong nahimutangan. Wala ko na sab madungog ang singgit ni Mama. Wala ko na siya makita nga nagsunod kanako.
Nalipay ako kay sa unahan may nakita kong kahayag. Gidulong ko kini. Nagkahanap ang akong panan-aw tungod sa kakapoy. Unya nahiabot gyod ko sa dapit nga dunay kahayag.
Natumba ko. Apan klaro pa sa akong panan-aw ang mga babaye nga miduol nako. Ila kong gitabang. Ilang gisapupo. Mga madre diay sila. Ug nakapahiyom ko. Usa ka monasteryo ang akong napuntahan. Taliwala sa kangitngit, nahiabot ko sa kahayag.
Nasayod ako nga luwas na ko sa maong dapit. (Kataposan)