Sukod sa kaligdong

Gikan sa ika trayenta dos nga andana sa nagbuntaog ug nanganawkanaw nga Labata Towers nga naa nahimutang sa Makati, gipahigayon ang top level conference sa Lee Montz Group of Companies. Gitambongan kini sa tanan sakop niining board of directors.

"I want that our cement plant will rise before my 90th birthday in barangay Cantolaroy in Cebu." Bug-at ug puno sa otoridad nga namulong ang tsinoy ug nagkangokango na nga Chairman of the Board sa maong kompaniya nga mao si Mr. Lee Montes.

Milihok dayon ang mga gaway sa maong higanteng kompaniya. Si Mr. Cirilo Lou ang overall-in-charge sa maong operation sa pagtukod sa cement plant sa barangay Cantolaroy. Nanglupad dayon ang mga sobre para sa mga government agencies nga mahilambigit sa maong proyekto lakip na sa local government unit sa lungsod sa Timbuktre diin nahisakop ang barangay Cantolaroy. Nialegre og kalit ang buwangan.

Samtang sa halayo nga dapit sa Cantolaroy, mga ikapitong patag gikan sa kinapusoran sa lungsod sa Timbuktre, nag-conduct og emergency meeting sila si Kapitan Bestre ug ang iyang konseho.

"Ako kining ipresentar sa mayor kining atong resolusyon sa konseho nga nagpakita sa atong dakong pagsupak sa pagtukod og cement plant dinhi sa atong barangay," kusganon nga namulong ang ligdong nga kapitan.

Kuyogan ka namo kapitan sa pag-adto sa municipio, nakahibalo ka na nga suportado ka kanunay namo sa imong mga maayong katuyoan," matud ni Konsehal Oliverio.

Pagkaugma niana didto sa municipio sa Timbuktre. Nisinta si Mayor Andalo.

"Hunahunaa Kapitan Silvestre S. Talyon ang dakong kahigayonan kun matukod na unya ang planta. Ang atong mga katagilungsod labi na ang imong mga katagibarangay aduna na unya'y trabaho. Dili na unya daro sa kabaw ug pokot sa isda ang kuptan sa atong mga kabataan kun dili computer na unya."

"Apan mayor, nakahibalo kana nga maayo ang lakaw sa among pagpanguma ug pagpamuhi og kahayupan maingon man ang pagpangisda didto sa among barangay," matud ni Kapitan Bestre.

"Gigasahan kami sa kahitas-an og adunahan kaayo nga kalikopan, tabunok kaayo ang yuta ug abunda sa isda ang kadagatan. Dili kami motugot nga madaot kini." Nitingog usab si Konsehal Takya.

"Kun matukod na unya ang cement plant mayor, mousbong usab ang mga balay kahilayan nga maoy makahatag unya og kasamok sa pagpuyo sa mga managtiayon."

Nagpa-conduct dayon og background check ang kampo nila ni Mr. Cirilo Lou mahitungod sa pagkatawo ni Kapitan Bestre. Nangita sila og boslot aron pagdaot niini. Apan ilang nasuta nga wala gayu'y lama ang pagkatawo sa kapitan. Ligdong kaayo kini, gani gipauli ang suborno nga salapi gikan nila ni Mr. Lou. Daghan kini og proyekto nga gipasiugdahan nga nakahatag og kabulahanan sa iyang mga katagibarangay.

Natugaw ang malinawon nga barangay sa Cantolaroy dihang nitugpa ang helicopter nga lulan sila si Mr. Lou ug si Mayor Andalo. Wala makabalibad si Kapitan Bestre dihang giimbitar kini nila ni Mr. Lou. Nikuha sila og usa ka private room sa Sin City Bikini Bar sa dakbayan sa Sugbo. Dungan sa pagtukar sa usa ka sweet music, migawas og kalit ang usa ka sexy ug makabibihag kaayo nga si Valerie Rodriguez, usa ka dancer sa grupo nga Sex Bomb Babes. Naghikohiko kini nga nagsayaw daw usa ka sawa nga nangita og tukbunon. Hinayhinay kini nga nisabak ni Kapitan Bestre.

Kalit lang mitindog si Kapitan Bestre ug masuk-anon kini nga namulong ...

"Dili ko ninyo madala og suburno. Wala ko magdahum nga sa inyong kataas og posisyon sa katilingban ingon sab diay kaubos ug kabastos ang inyong pagkatawo."

Wala makatingog sila si Mr. Lou ug si Mayor Andalo. Nanglipaghong ang nawong sa duruha. Ilang nasuta nga dili diay madala og suburno ang kapitan, kuwarta man o babaye. Aduna pa diay nagpabilin nga mobarog gayud sa prinsipyo sa katarong. (Kataposan)