Nagtakoban nga pagbati

Gula 24

Nabatyagan ni Denia nga misamot ang kauga sa tinagdan ni James kaniya.

“P-pasensiya na ka,” ni Denia pa nga matahaon. “Pero misugmat ang arthritis ni Nang Luding maong ako na lang ang iyang gipahatod sa imong pagkaon. Maglisod kuno siya pagtikang sa hagdanan.”

“May arthritis ba diay si Nang Luding? Ang akong nasayran mao nga migraine ang iyang sakit. Mao kini ang kanunay niyang gimulo sukad pa kaniadto.”

Wala makatingog si Denia. Nag-blush siya ingon sa nabuko ang iyang pagpamakak. Ang tinuod wala siya masayod kun unsay sakit nga gimulo ni Nang Luding. Iya lang kadtong alibi aron may lig-ong sukaranan ang iyang pagpangunay sa paghatod sa pagkaon ni James.

“Ipahimutang kanang mga pagkaon sa lamesa,” matud ni James. “Ug makagawas ka na. Way kapuslanan ang imong pagpa-charming. Di ka nako type.”

Morag gitamparos si Denia. Wala niya kapugngi ang pagpanginit sa iyang aping pagkadungog sa gisulti ni James.

Pa-charming?

Usa ka dakong insulto alang kaniya ang akusasyon ni James. Dili maoy iyang tuyo ang pag-display sa iyang beauty sa iyang pagsulod sa lawak ni James, kun dili ang paghatod sa pagkaon niini. Iya kining gialagaran tungod kay giisip niya kining agalon. -- Sumpayan pa