Room for rent

Gula 80

Gusto kong molikay kang Albert apan wala nay panahon. Apiki na kaayo. Duol na siya kanako.

“Asa ka man?” Gipangutana dayon ko ni Albert dihang nagkaatubang na kami. “Nganong sayo ka mang mibiya sa balay?”

“Moadto ko sa downtown,” laktod kong tubag. “Duna koy paliton.”

“Di ba nagkuyog man mo si Denver kaganina sa inyong paggikan sa balay nga atong gipuy-an?”

“Oo. Niuna na siya’g sakay. Di man mahimong magkuyog mi’g sakay kay lain man ang iyang destinasyon kay sa akoa.”

“Kita na lang hinuon ang magkuyog.”

“U-unsa?”

“Sige na, Phoebe. Kuyogan ko ikaw ngadto sa downtown.”

“U-unya, ang imong trabaho?”

“Mag-half day lang ko ron. Gusto kong makig-uban nimo karon. Mo-check in ta.”

“H-ha?”

“Ayaw ko’g balibari. Higayon na ni nato. For a change. Sige man lang tang adto magrabadang sulod sa ako o sa imong kuwarto. Magpalain na sab ta’g lugar.”

Mobalibad unta ko apan ambot og ngano nga dili man nako ikapadayag ang akong pagtutol. Mora ba’g dili gyud ko makahimo pagsupak sa gusto ni Albert. Magsunodsunod lang gyud ko sa iyang gusto!

Nanakay mi’g taxi paingon sa downtown. Ug bisan adlaw’ng dako, nangahas mi pagsulod sa usa ka baratuhong motel sa downtown area. Short time lang. Aron bisan sa makadiyot magkauban mi sulod sa usa ka pribado ug bugnaw nga lawak.

Kay limitado man mis oras, wala mi mag-usik og mga gutlo. Gisaw-an gilayon namo ang pagtagay sa lawasnong kalipay. Dili mahubit sa pulong ang kalalim nga mihakop kanako sa dihang nagkadungan kami si Albert pagsangko sa kinapungkayan sa himaya.

Human sa makutas namong bugno sa kama, mibangon ko ug misulod sa banyo.Sa akong paggawas, naghigda pa gihapon si Albert sa kama. Misantop sa akong hunahuna nga sultihan ko na siya nga gusto kong putlon na namo ang binuang namong relasyon. -- Sumpayan pa