Room for rent

Gula 78

Na-realize nako nga karon nga nasugdan na ni Sir Mateo ang pagpahimulos sa higayon, posibleng mahigalam siya sa pagdimdim sa katam-is sa akong pagka-babaye. Nakaseguro kong pahimuslan gyud niya ang akong kahuyang ug ang kahigayonan nga mipabor kaniya.

Nagmahay na hinuon ko karon kun nganong mipatol pa ako kang Mario, kang Kenneth ug kang Albert. Bisan wala masayod si Sir Mateo sa sekreto namo ni Kenneth apan apil kini sa akong gibasolan kay kabahin man gihapon kini sa akong pagpakasala sa kaminyoon namo ni Denver.

Apan ang mas grabeng nakaapekto nako mao ang akong pagpakigrelasyon nila ni Mario ug Albert. Kini ang hinungdan nga nakakita’g paagi si Sir Mateo sa pag-angkon sa akong pagka-babaye sa dakong kasayon.

Sus, kaluod! Gibati ko ang hilabihang kaluod sa dihang giangkon ni Sir Mateo ang akong pagka-babaye sanglit wala man gyud ko makagusto kaniya bisan gamay. Dili gyud siya madawat sa akong ginhawaan. Bisan tuod kun gibati gihapon nako ang lawasnong gana sa iyang gibuhat nakong palami apan nagdumili ang akong kabubut-on pagdawat sa iyang gihimo.

Mao nga nagbasol ko sa akong nabuhat nga pagpakasala sa kaminyoon namo ni Denver. Kasal-anan ko ang tanan. Ug mora’g nagsugod na ko’g bayad sa nahimo kong kasal-anan.

Nianang pagkagabii, wala ko makatulog. Naghiwasa ko sa ibabaw sa higdaanan. Naikag ko ni Denver nga naghigda sa akong tupad nga nahinanok na pag-ayo. Kusog na kaayo ang iyang hagok.

Nindot gyud diay ang bation sa tawo nga adunay peace of mind. Sama kang Denver nga malinawong nahikatulog. Dili sama nako nga bisan lawom nang gabii nagpabilin pang nagmata. Wala pa gani batia’g duka kay ang akong hunahuna gikuligaw man sa kahasol, kabalaka, kabalisa ug kahadlok. Guilty ko sa mga panghitabo sa akong kinabuhi!

Lawom nang gabii apan wala pa gihapon ko makatulog. Naglimbaglimbag ko sa ibabaw sa higdaanan. Hangtod nga natukbilan nako si Denver ug nakamata siya. Nakugang siya human nasuta nga wa pa diay ko matulog.

“May problema ba?” Nakapangutana si Denver nga ingon sa natingala sa akong mga lihok.

“Wa man,” namakak ko.

“Pero ngano man nga mora’g wa ka man mahimutang? Unsay nakahasol sa imong hunahuna, Phoebe?”-- Sumpayan pa