Kagawasan ni Marman

Human sa panihapon, mahinamon nga nag-alirong sa pagpanglingkod ang pamilyang Mantus sa halapad nga sopa sa hawanan. Ang amahan nga si Nong Bihog Mantus ug ang asawa nga si Nang Mayla, malipayon nga nagpasiklap sa nagkatapok nga mga anak ning gabhiona.

Diha sila si Henry, Nelson, Jimmy ug ilabi na gayud si Marman nga maoy nagsugyot sa iyang mga ginikanan nga magtigom sila ning gabhiona, kay aduna siya’y mahinungdanon nga ipahibawo kanilang tanan.

Alang kang Nong Binog ug Nang Mayla, daw nasayran na nila ang tumong ug tuyo ni Marman, ngano nga nagpatawag kini og tigom uban sa iyang mga igsoong lalaki nga pulos na mga minyo. Kamagulangan nga anak si Marman ug sa edad nga 35 sa pagkakaron nga usa ka CPA ug nagtrabaho na sa usa ka dakong pribadong banko sa siyudad, mao na lamang kini ang wala pa maminyo. Sila si Henry, Nelson ug Jimmy nga pulos na mga eligible ug lisensiyadong maestro sa publikong eskuylahan nga elementarya sa Barangay Bahak, parehas na usab nga mga minyo sa mga maestra na usab nilang mga asawa.

"Lagmit magminyo na gayud si Manoy Marman....!" hunghong ni Henry ngadto ni Nelson ug Jimmy nga mahinangpong naglingkod sa sopa.

"Apan wa man ko makamatikod nga adunay uyab si Manoy...!" nagyangoyango si Jimmy.

"Bitaw no...!" sagbat sab ni Nelson. "Lagmit kauban ra niyang empleyado sa banko....!"

Sila si Nong Binog ug Nang Mayla, nagtuo sab nga magminyo na gayud si Marman. Taudtaod, miabot si Ronie, ang kaubang empleyado ni Marman sa banko, nga usa usab ka CPA. Nangayo kini og katahuran sa pamilya ni Marman. Puno sa kadasig nga misugod dayon sa pagsulti si Marman ngadto sa iyang mga ginikanan ug mga igsoon.

"Maayo kay miabot na si Ronie! Siya ang bugtong saksi sa pangayuon kong kagawasan kaninyo, Pa Binog ug Ma Mayla, ingon man kaninyo, Henry Nelson ug Jimmy...!"

"Way problema, Manoy! Andam ming maminaw...!" nagkadungan sa pagtubag sila si Henry, Nelson ug Jimmy.

"Aw, kun magminyo na gyud ka, Marman, ikalipay namo ni Mama mo!" nagpahiyom si Nong Binog nga mitutok kang Marman nga naglingkod sa sopa nga tupad ni Ronie.

"Kun kagawasan man sa pagminyo ang imong pangayuon gikan kanamo ning gabhiona, aw, pabor ming tanan, Marman!" nagkihatkihat usab si Nang Mayla.

Mitindog si Marman ug mitindog usab si Ronie.

"Dili kagawasan sa pagminyo ang akong pangayuon karon kaninyo, Pa, Ma! Kun dili usa ka kagawasan sa pagdawat ninyo sa kamatuoran...!"

"H-ha? Kagawasan sa pagdawat namo sa kamatuoran?" naiknat ang kilay nila ni Henry, Nelson ug Jimmy nga nagkadungan og sulti.

"Oo, Pa, Ma, mga igsoon ko! Dugay ko na kining gitipigan. Ug si Ronie lang ang nasayod sa tanan...!"

"U-unsay buot mong ipasabot, Marman?" sukot ni Nong Binog.

"Pangayuon ko karon kaninyo ang akong kagawasan .... kagawasan sa pagladlad sa matuod kong pagkatawo...!" ni Marman nga mikalit lang og kaluray ang tingog, mikiay ang sampot ug mikingking ang mga tudlo nga paraygong migakos kang Ronie. Nagkatinutokay sila si Nong Binog, Nang Mayla, Henry, Nelson ug Jimmy nga wa makatingog nga mitutok kang Marman nga nagparayeg kang Ronie niadtong gabhiona. (Kataposan)