Room for rent

Gula 76

Akong natugkad nga may daotan nga tuyo si Sir Mateo Rambaud kanako -- sa akong pagka-babaye. Misamot ang akong pagpanglimbasog nga makahiplos ko gikan sa hugot kaayo niyang paggakos nako.

Dihang nakahigayon, hinurot ang tanan kong kusog nga gitukmod nako si Sir Mateo. Nakabuhi ko gikan sa hugot niyang paggakos. Dihadiha misibog ko aron makapalayo kaniya.

“Bastos kang dako!” Giingnan ko siya. “Itug-an ko ikaw sa imong asawa niining imong gibuhat nako!”

“Sige,” ni Sir Mateo pa nga mora’g nangisog na hinuon pag-ayo. “Buhata kana...kay isumbong ko usab ikaw sa imong bana!”

“U-unsay buot mong ipasabot?” Mikurog ang akong tingog nga ingon sa kalit lang gihakop sa disappointment.

“Nasayod kos imong binuhatan, Phoebe,” ni Sir Mateo pa. “Wa ka lay kasayoran nga suod kaayo mi si Mario. Sa wa pa siya mamatay, gisultihan ko niya mahitungod sa inyong relasyon.”

Mora’g nahugno ko sa akong nasayran. Pagka-wala nako magdahom nga gawas kang Kenneth, may lain pa diay’ng nasayod sa tinagoan namo ni Mario.

Wala man sab gud makahisgot si Mario nako nga suod diay niya si Sir Mateo. Karon lang nako masayri ang maong kamatuoran.

Namula tingali ang akong nawong kay ingon sa nanginit man ang akong aping. Mora ko’g mahilis sa kaulaw sa atubangan ni Sir Mateo.

“Dili kay kana ray akong nasayran mahitungod kanimo, Phoepe,” namulong na usab si Sir Mateo.

“U-unsay buot mong ipasabot nianang pagkasultiha?” Gisukit ko siya.                                                                                                   

“Nadiskobrehan ko na usab ang kinawat-kawat nga binuhatan ninyo ni Albert. Ang inyong pagdula sa kalayo.”

Wala ko makatingog. Miduko ko sa atubangan ni Sir Mateo.

“Unfair kaayo kun imo kong balibaran, Phoebe,” nagkanayon si Sir Mateo. “Dili husto ang imong desisyon kun gusto kang si Albert ray mohapakhapak sa imong sampot.”

Wala gihapon ko motingog. Nakamatikod ko nga nahisugamak ko sa usa ka apiki nga sitwasyon.

Mihinay pagduol si Sir Mateo nako. Wala ko makalihok sa akong gibarogan. Daw sa nanglumoy ko dihang iya kong gigunitan. -- Sumpayan pa