Nagtakoban nga pagbati

Gula 17

Midali siya pagpaingon sa lamesa ug gipahimutang ang dala niyang pagkaon. Pagkahuman, nananghid na siya kang James nga mogawas na siya sa lawak niini.

“Ayaw una,” ni James pa.

Napahunong siya paglakaw paingon sa pultahan. Gilingi niya si James apan walay mga pulong nga nalitok ang iyang dila. Ang iyang tinan-awan ngadto kang James maoy naglitok sa pangutana nga wala ikabungat sa iyang baba.

“Gusto kong makigsulti nimo samtang nagkaon ko,” matud ni James.

“U-unsay atong panagsultihan,” Nangutana siya.

“Bisan unsa lang. Gusto lang kong malingaw.”

Wala na siya mangutikuti. Nakasabot dayon siya sa gisulti ni James. Ug nakahukom siyang iya kining paundayonan sa tuyo nga iyang matabangan ang ulitawo nga maka-recover gikan sa masakit niining kasinatian sa gugma kang Jinky Haber.

“Lingkod una diha,” matud ni James nga mitudlo kaniya sa sopa nga gipahimutang sa usa ka bahin sa lawak nga dili kaayo layo sa lamesa.

Milingkod si Denia. Sa makadiyot gibati niya ang tumang kabakikaw. Apan mipasulabi sa iyang hunahuna ang tinguha pagtabang aron malingaw ang nagmasulob-ong ulitawo tungod sa naangkon niining kapakyasan sa gugma.

Mitindog si James ug mipaingon sa lamesa nga nahimutangan sa mga pagkaon. Milingkod kini sa silya sa atubangan sa lamesa. -- Sumpayan pa