Ang June bride

Maingon nga si Federico maoy pinakaswerte nga tawo dinhi sa ilang lungsod sa Villaverde kay gawas nga guwapo siya, siya pa gyud ang nakasunod sa kabtangan ug bahandi sa iyang mga ginikanan nga bilyonaryo. Bugtong siyang anak busa solo niya ang maong katigayonan.

Tungod niini, dili ikalimod nga daghan gyung mga dalaga nga magpaduding kang Federico ug ang uban gani magpakita na lang gyud sa ilang mga linihokan bisa’g mga babaye sila.

Apan, ingon sa wala pa gyud mopitik ang kasingkasing ni Federico sa paghigugma. Kadaghan unta sa maanyag nga babaye nga may gusto kang Federico ug sila mga anak og mga sapian usab apan luya ang pagbati ni Federico para kanila. Unya, usa ka gabii, nahinumdom si Federico sa sulti sa iyang papa Facundo nga nagkanayon...

“Federico, anak, inig edad nimo’g bayinti uno anyos motuhop na kanimo ang dugo sa kaliwat. Ug dili nimo mapugngan nga moinom ka gyud og dugo sa mga birhen nga babaye....ug kutob sa imong higustohan dili gyud mobalibad kay madani sila sa imong tinan-awan, kay ang gahom sa pagka-ungo nga gikan kanamo, motapon na kanimo...”

Mao kini ang gikabalak-an ni Federico kay sa sunod semana mag-bayinti uno anyos na siya ug ang kabilin sa kaliwat iya na unyang mahuptan.

Tuod, pag-abot sa iyang ika-bayinti uno nga kasumaran sa adlaw niyang natawhan, kalit lang nga may nausab sa iyang pagka-tawo, gusto na siya nga modimdim sa dugo sa babaye ug labaw sa tanan kanang dugo sa usa ka virgin nga dalaga.

Ug natuman ang iyang gusto kay daghan na nga mga babaye nga gisuyopan niya sa ilang mga dugo. Ug ang uban gani nahimo na niyang hinigugma. Apan wa pa gyud niya makita ang usa ka babaye nga mao nay dad-on niya sa altar sa kaminyoon ug iyang iluon didto sa dako nilang mansion.

Unya, may usa ka babaye nga nakadani sa iyang pagtagad ug kini mao si Esterlita, ang anak nga dalaga sa mayor sa ilang lungsod. Maanyag si Esterlita ug wala pa gyu’y hinigugma ug mahilig sa musika. Unya iya kining gipangulitawhan apan midumili ang dalaga sa katarongan nga dili niya type ang adunahan nga lalaki sama kang Federico.

“Mahal ko ikaw, Esterlita. Tutoki ko, tan-awa ang akong mga mata,” hagawhaw ni Federico kang Esterlita dihang namisita ang ulitawo sa dalaga.

“Federico, nahigugma ka ba nako?” Sukna ni Esterlita.

“Oo, ikaw ang prinsesa sa akong kinabuhi, Esterlita,” bugnaw nga namulong si Federico. “Ugma, mao na bulan sa Hunyo, ug ikaw ang akong June bride kun sugton ko nimo karong gabhiona...”

“Ugma, paabota ako didto sa imong mansion, Federico. Kun moabot ko, nagpasabot nga imo ako, apan kun dili, nagpasabot nga dili ako nimo maangkon,” ni Esterlita pa dayong tindog aron mosulod na sa iyang kuwarto.

Ning gabhiona, sa bulan sa Hunyo, nia si Federico nagpaabot dinhi sa balkonahe sa ilang mansion. Iyang gipaabot si Esterlita. Tuod, miabot si Esterlita. Nanaog kini sa gimaneho niyang kotse. Unya iya kining gisugat sa may tugkaran, dayon iyang gidala didto sa dakong hawanan sa ilang mansion.

Gipatugtog ni Federico ang nindot nga instrumental nga honi sa ilang estereo. Iya dayong gisayaw si Esterlita, gisayaw niya kini ug gisayaw.

Unya, ingon sa naibog siya sa puti kaayong liog sa dalaga ug buot na niya kining ingkibon aron imnon ang dugo niini apan naunhan siya kay kalit man lang nga gipaak ni Esterlita ang iyang liog ug gisuyop ang iyang dugo.

“Aggghhhrrrrrkkk,” miagulo si Federico. “Es-Esterlita, usa ka sab diay ka mangtas sama nako...i-imong giinom ang akong dugo...”

“Oo, Federico, ug human niini ikaw na pud unya ang moinom sa akong dugo,” hagawhaw sa dalagang ungo. Ug mibawos si Federico pag-ingkib sa liog sa iyang June bride nga si Esterlita. (Kataposan)