Room for Rent

Naabtan ko si Albert nga nagkorti sa iyang bigote atubangan sa salamin. Mihunong siya sa iyang gibuhat pagkamatikod niya sa akong pagsulod. Miduol dayon siya nako.

“Tua na si Denver,” giingnan ko siya.

“Maayo hinuon,” ni Albert pa. “May oras pa ta sa pag-score. Di pa ko ma-late sa trabaho.”

Ug dihadiha dayon, gitangtang namo ang mga salimbong sa among lawas. Mihigda dayon ko sa kama. Gitapuk-an ko ni Albert. Ug iyang gipabatyag nako ang kalalim sa romansa.

Kadali rang mitaob ang kahinam sa akong kinatibuk-an. Ang ulyahot niini ingon sa mihakop ug miulipon sa akong galamhan.

Kaha nakasabot nga naghinamhinam na ako’g maayo, si Albert mi-penetrate dayon. Unya gitambayayongan namo pagbugtaw ang kahingpitan sa lawasnong kalipay nga gusto namong kab-oton.

Tuod man, nakab-ot gayod namo ang katagbawan sa himaya nga among gisaw-an. Ang langitnong sensasyon mihapuhap sa tagsatagsa namo ka kaugalingon. Mora’g mipahiyom ang langit alang kanamo.

“Sayo'g pauli unya,” giingnan ko si Albert dihang nag-ilis na mi sa tagsatagsa namo ka sapot.

“Ngano man?” Nangutana siya.

“Di mopauli’g sayo si Denver unya kay may tambongan siyang birthday party. Higayon na nato kini.”

“Good news na, da. Sige, mopauli ko’g sayo.”

Wala madugay, mainampingon kong migawas sa kuwarto ni Albert.

Dihang naghingudto na ang adlaw, nahiabot si Nena.

“Adto ta sa ilang Jonie-Agnes,” niya pa. “Nagkakorum na didto ang mga magdudula og mahjong.”

“Sige,” dali kong sanong.

“Nag-ilis ko’g dali-dali ug nanglakaw dayon mi.

Alegre ang among pagdula og mahjong. Nalingaw ko kay sagunson ang akong pagdaog.

Wala pay alas tres sa hapon, mipauli na ko sa balay. Samtang nag-inusara ko sulod sa kuwarto, misantop sa akong hunahuna si Albert. Mibati ko’g tumang kahinam samtang naghulat sa iyang pag-abot. -- Sumpayan pa