Nagtakoban nga pagbati

Gula 7

Nabati niya ang tingog ni James sa dihang milakaw na siya paingon sa pultahan. Mihunong siya. Sa iyang paglingi, iyang nakita si James nga mitindog gikan sa gilingkoran niini ug miduol kaniya.

“Unsay ngalan mo?” sukit ni James.

“D-Denia,” nasapid ang iyang dila. “Denia Auxilio.”

“Ako si James,” paila sa lalaki sa kaugalingon niini.

Nga alang kaniya wala na kinahanglana tungod kay nakaila na man siyang daan niini. Wala pa kini niya makita daan na siyang nakadungog sa ngalan ni James gikan kang Nang Luding.

Miyango siya agi’g paghangop sa pagpaila sa lalaki. Apan gilikayan niya ang pagtutok sa mga mata niini.

Gitunol ni James kaniya ang binukhad nga tuong kamot niini. Nabatyagan niya nga daw may kapid-an ka boltahe sa kuryente nga mikuyamang sa iyang lawas sa dihang naglamanohay na sila. Wala siya makasabot sa iyang gibati.

Gitabangan ni Denia si Nang Luding sa mga hiposonon sa kusina sa dihang nakapanihapon na ang ilang mga agalon.

“Nang Luding,” gisangpit niya ang lagas samtang naghugas siya sa mga plato.

“Ngano, Day?” Sukit sa lagas nga may gikurikuri usab sa kusina.

“M-may problema ba si Sir James?”

Ingon sa nakalitan si Nang Luding sa mao niyang pangutana.

“Nganong nakapangutana ka man niana?” Misumbalik pagpangutana si Nang Luding kaniya. -- Sumpayan pa